Walid Neqqic yeffeɣ-ed ass-a seg lḥebs n Lezzayer yekkaten ad-tesfeḍ isem Aqbayli/Amazi . D mmi-s n Teqbaylit yettwaḥebsen deg-uffir deg-unbir n useggas n 2019. Ur yenɣi ur yukir, ur d-yesskecem ara iqenṭaren n kukayin, ur yezzenz ara nnif-is, ur yessedrem ara tadamsa n kra n tmurt, ur yessɛedda lbaṭel ula ɣef yiwen. Yettwaṭṭef acku adabu azzayri d adabu n tkerkas, n txidas d wexnanas. Yettwaṭṭef acku d aqbayli. Adabu amhersan yebɣa ad t-yefk d asfel ! Yegr-ed fell-as tucmitin i deg yesserwat seg 1962 ar ass-a. Akka, yekkat aqbayli akken ad s d-fken “izzayriyen” tayet mgal “tagrawla n ucmumeḥ” i d-ilulen deg tmurt Taqbaylit.

Am yal tikkelt: Aqbayli ad yebḍu tamurt. Maca ur d-teqqim tmurt ara yebḍun. Lezzayer tedrem, temmečč, tettwagzer, tenza i tmura tinezmarin, tebḍa d iceqfan aqbel ad d-tlal. Adabu azzayri s tizzeɣzeɣt d tizzuɣyelt-is, yettruẓ deg Teqbaylit d warraw-is armi yenɣa kra yellan d asirem. Ad d-yas wass anda ara yemger ayen yak yezreɛ.

Walid Neqqic tɛeddan fell-as yiḍan n uwanek azzayri. Maca, Walid am wureɣ ur yettaɣ wammus neɣ rekku: xas grent ɣer lḥebs, kksen fell-as sser d lḥema, yeffeɣ-ed s lqed yezdin, udem-is ur ibeddel ara, yetcelliɛ am tezdeg d yiseɣ. Ixnanasen-agi i- yebɣan ad t-ɛeggben, ad hudden imal-ines, d iman-nnsen icemten: Walid d argaz! Nutni d at usekkak. Walid isem-is zeddig, ad zuxen yes-s wid-is. Nutni ad d-qqimen d tacmat deg-umezruy n talsa.

Walid yeqqel-ed ar twacult-is. Nessaram ad yaweḍ kra yeffud wul-is. Ayen yeḍṛ an yid-es ad d-yeqqim d tamsirt i ugdud aqbayli : win ur nekmiz i yiman-is, ulac win ara s-ikemzen. Annar, simmal, yemmal-aɣ-ed d akken : tizzayrit d Aẓekka, Taqbaylit d Azekka. Ma ulac awanek, ad nezzer deg-ulamek.

Buɛziz u Cebbi (Bouaziz Ait Chebib).