“Ɛlay a tazdayt ɛlay, kke-d sennig leḥwaṛi,
Azul siweḍ-as-t i yemma in-as lḥebs yegguni
in-as d gma i yezzenzen ma ad truḍ fell-as neɣ fell-i” IDIR( Amnafeq).
Deg yal tagrawla, deg yal tikli n kra n wegdud, d iḥerkiyen ixanaben d nutni i yessiɣzifen amrar n leɛtab, d nutni i d imḍelleɛ n yeɛdawen, d nutni i d afus n lbaṭel. Qqaren, aɛdaw nebna fell-as, yuɛer lexdeɛ n watmaten, mači ala deg wegdud aqbayli kan i tella, temsalt-a, yal agdud yesɛa “JUDA”, yal tagmatt i ɛekfitt yiwen, akk tiqṣiḍin n imeqṛanen n dunnit, tekfa s lexdiɛ n wid ḥemlen wid ttamnen, atmaten-nsen, “REMUS akked ROMULUS”, atmaten yemyexdaɛen wid yebnan tiɣremt n “ṚUM”, “William le Waleys” udem n tegrawla Takusit , yemmut s lexdeɛ n wemdakkel-is akked win yečča tagella d lemleḥ.
Nezmer ad nader d igiman n imedyaten n lexdeɛ gar watmaten, gar yiwen wegdud, deg 4 n tɣemmar n dunnit; ihi ur ttaket ara awal i wid yebɣan awen inin belli lexdeɛ yella kan deg “YEQBAYLIYEN” ayagi d tikerkas, akken ad ṛẓen ifadden-nwen, ad tfeclem ad tebrum i ṭbel deg waman.
Ih, aṭas n yeqbayliyen ass-a umi teɛṛeq teɣṛibt-nsen, yesderɣl-iten lakul n lezzayer yeḥfan, yerra tinekkit-nsen d lɛib, akken yerra tameṭut d lɛib telha kan deg wussu d tkuzit ma beṛṛa ilaq ” argaz” ad ttyeffer s lḥiǧab neɣ skra n liṭul yellan.
Ula d taqbaylit d wagi i d iswi n tesnektit (idéologie) taɛṛabt-tisneslemt, ad ḍefṛen iqbayliyen d teqbayliyen, alamma nekkren s yiles-nsen d acuten, acku lakul ad ten-idegger ad setḥin ɣef nekwa-nsen d umezruy d yedles-nsen.
Aṭas n yeqbayliyen i yeddifilin imi terbeḥ lezzayer mgal meṛṛuk deg teqbuct taɛṛabt et apres ?
Ar waṭas n imeɣnasen, d tagara n teqbaylit, d tagara n tudert, tettum belli JSK turar taqbuct taɛṛabt asmi amennuɣ ɣef tmaziɣt yeṭṭeṛḍiq ( 1987,1989,1994), wid d-ilulen deg tallit-nni ula d nutni nnan-as tenger teqbaylit, maca aqlaɣ anda nella ass-a, ara nettnaɣ ɣef tlalit n “UWANEK AQBAYLI”, werǧin yedda umennuɣ n teqbaylit am iseggasen-a ineggura, d tidett yuɛeṛ webrid, iḍul umecwar, maca aqlaɣ deg webrid n tidett, win i teddun s tidett yessawaḍ.
