D aswir amaynut deg tṛuzi n tmurt taqbaylit, sɣur udabu azayri, win yebɣan ad yessettu tawaɣit ttidiren u tin ara yidiren iɣerfan n lezzayer deg seggasen i d-iteddun, ladɣa deg weḥric adamsan, imi tili n laẓ d tin yesberbren ɣef twaculin tizayriyin d leǧyub-nsent. ewwet-it ɣef lbecna ad yettu timẓin, deg yal tikjelt mi ara d-yekker wegdud aqbayli ad yessuter tilelli-ines, adabu azayri yetturar tawṛiqt n tɣellist d laman.

Mhenna Djebbar afettyan n yigen azayri yefɣen deg usseggas n 2014, ar westeɛfu, send imi yella d ajgu alemmas n tɣellist n tugdi yebna ufettyan Toufik Mediene azal n 25 n iseggasen. Yella mass Djebar ɣef uqerruy n tɣellsit n yigen (DCSA : Direction centrale de la sécurité de l’armée) ladɣa deg seggasen n lmut d tazla n idammen, isseggasen n 90, yetwassen belli d win ineqqen nebla akukru. Yewwi tirmi muqqren deg wamek ara yesseqdec tasertit d tɣellist akken ad yeṛz ifadden n wegdud d wamek ara yessexsi tanekra n wegdud.

Taselwit n tigduda tazayrit ɣef uqerruy-is mass Abdelmadjid Teboun, d tin i d-yeslulen ussan-a s wudem unṣib Tanila Taɣelnawt mgal Rebrab ( Direction nationale contre le terrorisme). Isem n Mhenna Djebbar d win i d-yettwaḥetmen sɣur arbaɛ n Toufik mači kan deg waḍu, imi send ad s-mudden tasqamut-a, ibeggen-d belli yuklal ad yuɣal d IMḌELLAƐ N YEƐDAWEN, amaynut deg tmurt taqbaylit, ladɣa imi aṭas n tamiwin i d-yettadren afus n Mhenna Djebbar deg tmest yekren deg nebdu-ya deg tmurt taqbaylit akked tmenɣit n Djmala Bensmail.

Mhenna Djebbar mmis n Larbɛa Nat Yiraten, d win i d-yesseɣlin nnger ɣef tama-ya deg asmi i dyuɣal ar useddu n temsal, asmekti kan belli yesɛedda-d ugar n 9 waguren deg lḥebs n Blida, deg Tuber 2019 armi d Yunyu 2020, send imi t-yessekcem ufettyan Gaid Salah ar lḥebs s sebba n tukkeṛḍa.

Mhenna Djebbar imi d aqbayli n serbis, d netta i d-yefren udabu azayri ad yili d afus n tugdi d lbaṭel mgal ayen umi semman asenfaṛ ” 0 Kabyle”, izux-asen ɣef leḥsab n wid i ɣ-d-yessawḍen isallen, belli ad yeṛẓ tamurt taqbaylit ad ttyer gar ifassen n udabu azayri, u ad yessenger MAK d tiktiwin-is deg tmurt taqbaylit.

Adabu azayri, s wudem n Mhenna Djebbar d tin i -d-yezzaknen tasertit-ines i tra ad texdem deg tmurt taqbaylit deg isseggasen i d-iteddun : TUGDI, LEḤBUS, TIMENƔIT, TIMEST, TIƔIN N YEMDANEN…. Ma nessusem ad ɣ-mḥun, iban wufrik.