0 3 minutes 2 ans
Ass n letnayen 21 meɣres 2022, Mohand Tilmatine yessedda asarag ɣef tutlayin timaziɣin di Tmurt n Ibaṣkiyen. Timlilit-a thegga-tt-id Garabide, yiwet n tiddukla iqeddcen ɣef tutlayin timenza (tiyemmatin) deg umaḍal ladɣa deg Marikan unaẓul akked Tefriqt ugafa.
ASARAG N mOHAND tILMATINE DEG TMURT TABASKIT
Timlilit-a, ɣef usegmu n tutlayin tineṣliyin, ttekkan deg-s aṭas n imeɣnasen seg waṭas n temnaḍin, yal wa s tutlayt-is gar-asen:
Seg Imapucen, llant Paola Ñaculef, Viviana Nehiual akked Catalina Huenulef (Tamurt n Cili). Seg tutlayin timaziɣin: Saïd Hamad Mimon (Mrič, Melilla), Noufel Bouzeboudja (Tamurt n Yeqbayliyen) Asya Zayzaoui (Tamurt n Irifiyen). Ikičiyen: Gladys Aidee García Yac (Gwatemala). Ikičwiyen: Fioneth Verónica Ortega Baptista, Cristina Rendon Vega (Bolivya). Diego Mauricio Perugachi Cumba, Tukeres Maṭango, Lisbeth Florez Jara, Marino Corimanya Gutiérrez, Javier Menzoza López akked Marino Corimanya Gutiérrez (Tamurt n Piru). Inehwaten: Leticia Vázquez. Inehwaten Pipil: Alexandra Álvarez. Inasaten: Carlos Eduardo Ruda Trochez akked Luz Dary Vitonas Ramos. Igwaṛaniyen: Marcia Mandepora. Imayaten n Yucatán: Lizbeth Carrillo Can, Patricia Chan Us akked Yamili Chan. Tin yessedayen agraw-agi, ass s wass, d Milouda El Hankari (Tarifit).
Mohand Tilmatine yefka-d kra n tewlafin ɣef tutlayin timaziɣin iwakken ad negzu tilawt-nsent, iɣeblan i d-tmagarent, d tifrat i nezmer ad nessumer iwakken ad gmunt, ad ilint d tinezmarin. Awelleh i d-yezzin d winna d akken tamaziɣt d tutlayt aẓaṛ i d-yefkan tutlayin am Teqbaylit, Tarifit, Tacelḥit, Tamahaqt, Tacawit, Tamẓabit… Tigi d tutlayin yemdan, ur llint ara d tanfaliyin (tidyaliktiyin) sɛant amḍiq deg tmettiyin n wid yettmeslayen yes-sent, xas akken llan wid yebɣan ad ssemlilen tutlayin-agi akk di yiwet kan, tinna iwumi qqaren: Tamaziɣt.
S wudem n tusna n tutlayt d tmetti (socio-linguistique) Mohand Tilmatin yefka-d imedyaten s wazal-nsen iwakken ad yessegzu ṛray-agi.
Asarag-a yegla-d s weskasi akked wat n tutlayin-agi i d-nebder d asawen. Yal ta d wa yefka-d ṛṛay-is, yemmeslay-d ɣef tilawt tettidir tutlayt-is.
Noufel Bouzeboudja