Tasqamutt yekkaten ilmend n tlelli n Lwennas Ḥemzi d tin i d-yessawlen ar tikli n yiseɣ d ibeddi, azekka n lǧemɛa 05 Furar ɣef 13H00( Lweḥda) n uzal, akken agdud aqbayli ad d-ibeggen ibeddi-ines ar yidis, n gma-tesen, n mmi-tsen, acku Lounes ur yelli deg wacu yecceḍ, d tayri-ines ɣef teqbaylit i tyessawḍen ar lḥebs n lḥerrac.
I wesmekt Lwennas Ḥemzi yekcem ar lḥebs n Lḥerrac ass n lexmis 8 Tuber 2020, ugar n 4 waguren aya, s tuzmiwin-agi sɣur taɣdemt tazayrit ” Asenquqel n tdukli taɣennawt tazayrit” d ” Aheggi d useggem n umussu n ccwal”, ɣas ulamma Lounes sbeɛden-t ɣef tmurt taqbaylit, maca ibugaṭuten-ines d wid i d-yettawin isallen fell-as, qqar-ed belli Lounes ur yekni ara, ur yefcil ara, yesla ɣef wayen akk xedmen fell-as imeɣnasen, Lounes yettraju ad yekker yakk wegdud aqbayli mači kan deg makuda, maca deg yal tiɣmert n tmurt taqbaylit.
