Tugett ur neẓri ara belli di yiwet n tallit deg umezruy-nneɣ, tamurt n Yeqvayliyen s wudem n tgelda n Kuku tella tesεa inemhalen di tmurt n Spenyul. I tallit nni, yers-d wemnekni ger Kuku, At Σebbas, Spenyul, d Iṭeṛkiyen.
Tikkwal amtawa ger Spenyul d Kuku mgal At Σebbas d Iṭerkiyen; tikkwal nniḍen d anemgal.
Maca deg 1598; Iqvayliyen gan yiwen wudem zdat Uteṛki, dduklen mgal-ines.Daɣen, adavu n iεetmaniyen di Lzzayer yeftutes.
D annet-a i yeǧǧan Amar Ulqaḍi ad issuter amtawa aked Spenyul; maca ira ad isseǧhed tagelda d leḥkem ines, rnu ɣeṛ-s, ad iẓẓeε iṭeṛkiyen si tmurt is.
Di 16 yulyu 1598, agellid n Kuku yuzen yiwen wemyaru i ugellid n Spenyul. Win i as-tt-iwwin i ugellid Felipe d mmi-s n gma-s n Amar Ulqadi : Malik Agellid n Fez El Mansur issumer-as-d i ugellid n Kuku ad iẓdem ɣef Iṭeṛkiyen si tama n Tlemsan ma yella yeqvel ugellid n Spenyul ad yekki yid-sen.
Amar di tallit nni ma d tidett ayen yura di tebratt ines, yella yesεa 100.000 yergazen yid-s, d igen amuqṛan. Madrid ad terveḥ amsisa di Tferka Ugafa rnu, agellid n Kuku iṛeggem ispenyuliyen belli ad yanef i imsenza imasiḥiyen ad zenzen ileswaq n tmurt-is.
Spenyul llan ttmserkacen nutni d iṭerkiyen ɣef wegrakal, maca ineggura-a gezzmen-d avrid ɣef lembwavar nnsen.
Tamuɣli n ugellid n Kuku twehha ɣer Mezɣenna, ira ad tt-id-yerr imi di tmuɣli-ines d ayla-s, d akal aqvayli. Jeddi-s yakan Aḥmed Ulqadi, yeṭṭef tamdint n Lezzayer si 1520 ɣer 1527 asmi i yeɣleb Barbaṛus di Tizi n At Σica.
Issuter deg ugellid n Spenyul ad as-d-yazen lembwavar εemmṛen d aḥlalas, d icettiḍen akked d tɣawsiwin nniḍen. Ayen i d-yellan deg useggas n 1607 deg uzeffun.
Seld tadyant-a, Amar Ulqadi ibeddel tikli, yenneqlab ɣef spenyul maca Lǧemεa n Ssariǧ teɣli ger ifassen n Ṭurk ihi yid-sen tura i d-tewwi ad yili wawal. Yefra-tt yid-sen, wa ad yerr akal i as-ikkes i wayeḍ.
Syin akin, seg 1608 armi d asmi yettwanɣa di 1618 s ufus n wat wexxam, agellid n Kuku yeεṛeḍ ad iseggem tagnitt akked d Spenyul maca werǧin i d-tuɣal teflest ger Madrid d Kuku.
Boyer Pierre. Espagne et Kouko. Les négociations de 1598 et 1610. In: Revue de l’Occident musulman et de la Méditerranée, n°8, 1970. pp. 25-40.
Mikusan Lapaz
