Ass-a n 18 yebrir 2022, d asmekti n tmettant n Massinissa, asnawan n 19 n iseggasen sɣur ijadeṛmiyen izayriyen deg At Dwala; 21 n iseggasen-aya, wid i tyenɣan ur cuṛɛen xas ulamma nezṛa belli d ajedaermi Merebet Mestari i yḥuccen iḍarren-is.
Acu yeḍran ass n 18 yebrir 2001 ?
– Ass n Tlata 18 Yebrir 2001, ɣef 18h30, Sdat wexxam n massinissa win ibeɛden azal n 200 n lmitrat ɣef tesnawit anda yeqqar, tlata n ijadeṛmiyen izayriyen deg tkaṛṛust “LAGUNA”, ẓedmen ɣef yiwet n terbaɛt n yelmeẓyen akken ad ten-refden. Massinissa yesla-d i wahṛaḥut yeffeɣ-d deg axxam, yettwaṭṭef qbel wemdakel-is ” Kouceila Mraket” send aki zzin-d ar ɣur-es, refdent.
Ayen ilaqen ad nini, akken Massinissa d win i ḥemlen ddabex n uḍar, akked Lwennas Matub, anda tturaren netta d yemdukal-is, d abrid, ijadeṛmiyen zgan ttɛeddayen-d dinna, gar-asen yella ladɣa win ara iqeṭben iziɣenr-is.
– Ad tili ahat d 19H30, imi wḍen Kusayla d Massinissa ar daxel n wexxam n ijadeṛmiyen. Massinissa mačči d win yettṣubbun ixef-is zzat n ijadeṛmiyen n lezzayer akked d lbaṭel, d ayen ur neɛǧib ara ajadeṛmi t-yeṭfen wagi d Merabet Mestari, i s-yesḥillifen s klacnikuv-ines, yellan yakan ɣef ddnuc, yeqqar-as ɣef leḥsab n wid i ḥedṛen ” Ad teqqimeḍ deg wemkan-ik neɣ ad k-ḥucceɣ iḍarren”, d ayen i yexdem kra kan n dqayeq, imi massinissa ur yugad ara, ma d Merabet Mestan ur ikukra ara ad yenɣ ilemẓi n 19 n iseggasen.
– Massinissa wwin-t ar la clinique d-iqeṛben send imi ssawlen i bab-as, imi yewweḍ ar “la Clinique” walan mači d ayen umi zemren, massinissa yeqqar kan ” UGADEƔ AD MMTEƔ“, ijadeṛmiyen sutren deg imejjayen ad ǧǧen massinissa ad d-lhun deg wemdakel-nsen yettwaḥuzen ar temceṭ n uḍaṛ. Amejjay n tɛessast yerra-yasen-d srid : ” Sureft-iyi, maca d ilemẓi-ya i yenṭaṛṛen ɣef wemdakel-nwen”. Ayen d-yettbegginen belli ar ijadeṛmiyen massinissa d ayen yakan yemmut.
– Massinissa yettwaceggeɛ ar sbiṭar n Tizi-Wezzu deg iḍ, Bab-as Xaled Guermah i d-yuɣalen deg yinig akken kan yesla yewweḍ ar mmi-s, yebɣa ad tiwali xas ulamma yenṭeṛ, akken t-id-iwala mmi-s yenna-yas : ” A Baba ur ttḥulfuɣ ara i yḍaṛṛen-iw, ini-d a baba ad uɣaleɣ ad lḥuɣ ? Nɣan-iyi a baba, ur ttḥulfuɣ ara i wammas-iw!“.
– Lexmis 19 yebrir 2001, Massinissa yettwaceyyeɛ deg Tizi ar Tmannaɣt tazayrit, ar sbiṭar n Mustapha, anda i s-ɛawden acellaḥ, maca dayen ifut lḥal.
– Lǧemɛa 20 Yebrir, masinissa yemmut ɣef 8H15.
– Letnayen 23 Yebrir, Masinisa ad yenṭel deg tadder-is
21 n iseggasen i yezrin ɣef 18 Yebrir 2001, Masinisa yemmut, ajadeṛmi i t-yenɣan Merabet Mestari d ilelli yessuli itri ɣef tayett-is. 21 n iseggasen ɣef lbaṭel, ɣef tmettant, ɣef temharsa, ɣef tsusmi. Masinisa yemmut, tɛawded talalit tmurt taqbaylit s usenfaṛ-ines asertan, i yettwarefden deg wulawen n imelyan n yeqbayliyen, asenfaṛ n uslali n uwanek aqbayli, win ara yerren tajmilt i masinisa, win ara yesseḥbibren, akken weǧin ad yuɣal ad yemmet yiwen deg warraw-is.
