TALALIT N UMUSSU N « ARC »
Deg useggas n 1967, Edmond isnulfa-d netta d gma-s ameqqṛan Max ( amejjay ula d netta) tuddsa ara irefden amennuɣ ɣef timanit n Kuṛsika, umi semman ARC ( Tigawt tamawit takuṛsikit-action régionaliste corse), di tazwara ur d-seddan ara ula d awal n ” Timanit”, lhan-d d wawal ” agdud akuṛsiki” d netta irefden anamek asertan n umennuɣ d yeswi n tuddsa ARC, ssersen-d timsal n tmeti am Tseddawit, tutlayt d yedles.
Tamuɣli-nsen yakan tella d tin yezwaren lweqt-is, ilaq aṭas n tebɣest d taɣeṛt uqeṛṛu akken ad trefdeḍ ayen refden d amennuɣ deg wakud am winna, anda agdud akursiki yella d win umi ur tekcim ara s aqeṛṛu tifrat n beṭṭu akk d uwanek Afṛansi, anda aneggaru-ya yugi akk awal nniḍen yeffɣen i webrid n tjakubinit, d tefṛansist.
Talalit n umussu ARC, d beṭṭu umi yessawal mačči kan akk d tjakubinit tafṛansist, meɛna akk d iqeffafen-ines i tezreɛ di Kuṛsika, akk diɣen d tukkeṛḍa d ddreɛ xeddmen iqeddacen n Fṛansa.
Di tallit-nni, ticki ara yaweḍ Edmond d yemdukal-is ar kra n taddert di kuṛsika akken ad berrḥen s unamek d yeswiyen n tuddsa-nnsen, refden anay akuṛsiki, ayen yessewhamen imezdaɣ ttmagaren, imi werǧin ssnen anay-a, ccɣel-agi yettbeggin-d liḥala n yimiren d wayen ɣeṛ tessaweḍ temsalt takuṛsikit assa-agi.
S umussu n ARC, Edmond d yemdukal-is rran tamsalt n tnekkit ar tlemmast n wannar aserti, rran-d zzux akk d rrezg ar wulawen d wudmawen n wegdud akuṛsiki, ssufɣen-t ar tikli netta yellan yakan yebra i ṭbel deg waman.
AKELLEF N WEQBAYLI BUƐZIZ DI FERRU N TAMSALT TAKUṚSIKIT :
Fṛansa tesɛuzzeg i ysuturen n umussu n ARC, deg uṣeggem n tudert n ikuṛsiken, ama di lebni n lwakul d sbiṭaṛat d ttawilat n usiweḍ, neɣ deg usekki n imezdaɣ deg uṣeggem n tudert-nsen d tmurt-nsen.
Terra imeɣnasen ikuṛsikiyen i refden amennuɣ n talwit ad ten-yeffeɣ leɛqel, ad uɣalen syen d afella d wid ara izeggden di tikli-nsen d ṣṣut-nsen, di tallit agi i yegzem di ṛṛay udabu afṛansi yessedduy Mass Giscard d’Estaing ad ikellef deg useggas n 1973, Libert Bouaziz ( aqbayli) akken ad yerzu ar tegzirt n Kuṛsika ad yemcawaṛ akk d iɛeggalen n umussu n ARC. Bouaziz yettwakellef akken ad yeɛṛed ad yaf tifrat i temsalt agi n Kuṛsika ibeddun tettaẓay ɣef tuyat n udabu n Paris.
Libert Bouaziz, yellan d aqbayli, yessnen acu umi qqaṛen tudert ddaw taṛkiṭ n ubeṛṛani ur iɛeṭṭel ara yefra-yasen-tt-id, imi i sen-yenna ” XAS ULAMMA AD TSEBBLEM 250 000 N IMEƔNASEN IKUṚSIKIYEN UR TESSAWAḌEM ARA AD TBEDDLEM TAMENDAWT N FṚANSA”, imeslayen agi yellan d tidett, ldin-d allen n imeɣnasen d yemdebbṛen n umussu ARC, gzan neɣ fehmen akken ilaq ad jkebden u ad rebḥen tameẓẓuɣt n imezdaɣ n tmurt n Fṛansa ma bɣan ad seddun ar sdat tamsalt takuṛsikit, d tirza agi n Buɛziz akk d imeslayen-is, i yessawḍen ar tedyanin n ALERIA.
Tagara n weḥric wissin, deg teẓrigt i d-iteddun ad tafem aḥric send aneggaru
