Tiɣremt n imceddalen i d-yezgan ɣef usammar n Tubirett s wazal n 40Km, teddar cwal muqqren iḍ n yiḍelli n Ssebt 16 yebrir, send tameɣra d-hegga tɣiwant n imceddalen akked tiddukla n ilmeẓyen n tama-ya.

Tameɣra anda tɣenna tcennayt taqbaylit Ṭawes, d tin i d-yellan deg wemṛaḥ n teɣremt n imceddalen, anda d-yezga lǧamaɛ. Asmekti kan ɣef yimi n yemdebbeṛ wissin n tɣiwant mass Fawzi Midun,deg wawal yefka i “Akhbar El Watan”, iwekked-ed belli d tameɣra i d-hegga tmehla n yelmeẓyen d waddal n tubirett akked tmehla n yedles.

Xas ulamma imheggiyen n tmeɣra, qudren imeẓẓulla n lǧamaɛ imi urǧan alamma kfant tẓallitin n yenselmen, s wazal n 1H, d wakken tebda, deg waya mass Fawzi Midun yenn-ad ” ugar n 40 n iseggasen-aya nekkni nxeddem timeɣriwen deg wemṛaḥ-a, ula deg seggasen n rrebrab ur nugad ara”. Imam n lǧamaɛ yettxemmim akken nniḍen imi akken izeggen yiḍ, yejeb iman-is daxel n lǧamaɛ, send akin yeṭṭef asawaḍ yessemɣuren taɣect, yebda ara ireggem, ineɛɛel deg imezdaɣ, armi yesseḥbes tameɣra. Awalen slan imezdaɣ n imceddalen, d ayen werǧin urǧin, maca ayen d-yeḍran yella iban ad yass wass deg ara d-yeḍru.

Amek imam yessaweḍ ad yesɛu tabɣest ad yergem iqbayliyen ?

“a baba wwetnaɣ a mmi ɛqelnaɣ”, Ass-a acetki ulaḥed azrem yewweḍ d talafsa, asmi d taqbaylit i yǧehden, isenselmen ddarayen taṛakna, ma d ass-a imi “JMEƐLIMAN” wwint waman, isenselmen zakanen-d idmaren-nsen, acku aṭas i nessusem.

Mači d tikelt tamenzut deg isenselmen d imamat-nsen ad kkren mgal cbaḥa n tudert taq baylit, ama deg Tizi neɣ deg Bgayet, deg At wertilan neɣ deg tubirett, deg Bumerdas neɣ deg Lberj, ula deg Tqesrayin ma tecfam asmi d-kkren ysenselmen mgal ansay n tmecṛeṭ. Akken twalam kra wanda tettazzal teqbaylit, tettganitt tisneslemt, tɛewwul ad s-terr takmamt, ad tt-tessenger.

Ayen yeḍran deg imceddalen iḍelli, d ayen d-yettbegginen tilawt n teqbaylit ass-a, tasnektit taɛrabt-tisneslemt d tin yebɣan ad tessenger taqbaylit ɣef wakal-is, ihi ma nbegges mgal tamhersa-ya ad nedder, ma nebra i ṭṭbel deg waman, ad ɣ-ɛezzin s ttwab ngger-nneɣ.