Karim Sadki ( Gaboné) deg tṛekkiṭ n Lwennas Matub, akken kan yebda taẓuṛi iban-ed am yetri, iḍṛisen yettaru d tiṛṣaṣin yessakayen wid i ḍeṛfen ɣef teqbaylit, d asmekti, d asakwi, d asduqqes d asegzi. Ulac win yeǧǧa yeṛḍeb ticki yesla i taɣect-is, yeqqaṛ-ed tiquṛanin, s wawalen fessusen fehmen yakk yelmeẓyen deg wakud anda yeṣɛeb lmenṭeq.
ilul-ed i ban-ed d itri...
Tizlitt tamenzut yessekles “Mmi-s n tmurt“, d tin i yessebṛaṛḥen tawwurt, akken imdanen ad ewɛun akeǧǧud yefren deg tebḥirt n tirga n Gaboné. d amaynut d tagrawla deg ṣenf-a n cna atrar “RAP”, yellan nniqal yettmuṛḍus, s isefra menwala deg waṭas n tikkal, ala rgum d usexser, neɣ d amennuɣ n tnuḍin gar inaẓuren yeṭfen taqaɛet n “RAP AQBAYLI”. Yewweḍ-d Gaboné, yewwi-d amaynut ama deg uẓawan, ama deg cbaḥa n tawlafin yesseqdac, ama deg tmedyazt tamḥaddit tin yuɣalen d nekwa n ” Gaboné”.
Gaboné ur yettcuḥḥu ara deg tẓuṛi...
Psychose, Barzidan, Dagi d leqbayel 1, Lkas deffin lkas, Covidéo, Dagi d leqbayel 2, D Aqbayli, Black List Part 1, Black List Part 2, Avarice, Iterlude, Ahh Lukan, Opium, Black List 3, Malade Montagne, Amnésia, Targit, Zouafistan, Haine, Tawaɣit, Gaboné Mania Part 1, Gaboné Mania Part 2. ugar n 22 n twiztin i d-yessufeɣ ar ass-a, d inigi n tallit yettidir, tallit n tura.
Gaboné-mania- Part 2...
D tagi i tizlitt taneggarut i d-yessufeɣ, ihi d tagi ɣef wayeg ara d-nemmeslay ass-a. Azwel kan n tezlitt-a yezzakan-ed amek tettwaɛrek, d tidett deg tezlitt ar tayeḍ Gaboné ass-a yuɣal d lwelha n yakk ilmeẓyen n tura, yettidiren yir tudert, tamuḥqranit d wayen akk i tent-yugaren ” werasirem”, xas ččuren wulawen maca ggugmen yelsawen , ayen akk i qebḍen tasa-nsen ufant deg tezlatin n Gaboné, armi yuɣal uẓawan-is d asebsi ur nxetti.
Ugar n wannect-a, Gaboné deg tezlitt-a, yufa awalen i ywenɛen akken ad yessefṛez tagutt deg nettidir, yemmeslay-d ɣef tiliẓṛiwin n lɛar yuɣalen d abendayer yesseḥmuyen aqbayli ar wegrireb, yessedda-d ladɣa BRTV, d netta i d anaẓur aqbayli amenzu i d-yewten deg tliẓri-ya, ɣef wayeg dduklen akk yeqbayliyen deg tlalit-is, tagara tezzi-d ɣef uzagur tuɣal d aẓṛu deg sebbaḍ n yal aqbayli.
Gaboné, ira ad yessaki iqbayliyen ɣef nger i ten-yettṛaǧun deg zeddi-nsen akk d wid yettgallan s lmut-nsen, yenna : ” xas xḍu i zeddi akked lewḥuc, ad ččen leḥq-ik s ddin…neqqel d irbiben deg wayla-nneɣ cukkern-aɣ Banu Hilal” imeslayen qessiḥen i d-yezzakanen tawaɣit yeggunin yal aqbayli.
Yemmeslay-ed ɣef tezleg n teqbaylit n wass-a, anda taɣect d-yufraren ttazzalen d iqbayliyen ad s-erren takmamt “Tesseḥfeḍem-aɣ tasusmi nezga nettagad lehduṛ neddal” .
Tizlitt-a ad teqqim d tisfi deg uzagur n yal aqbayli yeddarayen tabarda, yettṛaǧun ad tɛeddi tḥemmalt, yinwa d tin ur ngellu yara ɣef uqerruy-is, selt-as, zzuzret akken win ur nesli ad isel :
