Hakem Hocine, ilemẓi n 16 n iseggasen, mmi-s n Lǧemɛa n Ssariǧ d win i kecmen annar n tzuṛi deg tewwurt wussiɛen, ama deg ẓawan neɣ ladɣa deg tmedyazt. Aṭas i yettrun ɣef tsuta i d yettnekkaren, qqaṛen dewṛen s uzagur i tezlit tamḥaddit, maca Hocin d amedya ara yeskadben wid yqeḍɛen layas, d tafat ara yessiɣen asirem deg wulawen n yakk wid i ɛecqen tizlit tamḥaddit.
Ar tura Hocine d win i yesɛan snat n tezlatin yessekles deg tezrigin IRATH MUSIC, tid umi yexdem clip-Vidyu, yiwet “LAṢEL” tayeḍ d tajmilt i “LOUNES MATOUB“.
Tazlit “LAṢEL” aṭas ara yenwun d asḥissef ɣef liḥala n yeqbayliyen n wass-a yeǧǧan deg taqbaylit-nsen, refden ansayen ur nelli d ayla-nsen, ɣunzan tutlayt tayemmat ttzuxxun s tutlayt i ten-yerran d ineggura deg yal taɣawsa. Maca, ugar n wesḥissef “LAṢEL” d aḥraḥu amahat ad ndekwalen yeqbayliyen n wass-a deg zaylal i sen-iceklen ifassen i sen-yesderɣlen allaɣen ; aṭas aya ur nesli ara i wsentel-a ladɣa ar yelmeẓyen, imi ineggura-ya d wid yelhan kan deg cci n dunnit, akked wayen yekseb wemdan, deg waya Hocine Hakem, yusa-d d amedya i teddun mgal n tweffa n tidderɣelt yuɣen tasuta tamaynut, ɣef waya yuklal yakk asnimmer-nnwen.
Tajmilt i “LOUNES MATOUB” ugar n usuter n tidett ɣef tmettant-is d wid i tyenɣan, d lɛahed d tgallit i d-yecna Hocine s yimi-s yenn-ad akk ayen tettxemmim tsut-as, imi i beggen-it-id deg sefru ines, tajmilt ara nerr i Da Lwennas d aḍfaṛ n webrid-is d ukemmel n umennuɣ-is.
Hocine Hakem, cfut ɣef yisem-a, d win ara yesɛun imal yeǧǧuǧgen deg genni n tẓuri taqbaylit, ihi tanemmirt a Hocine imi telliḍ ɣef leqdic-ik zeddigen.
