Awal ɣef wungal-is “mmi-s ugellil”
Idlisen sεan zhar am wakken tesεan imyura? “mmi-s n ugellil” (fils du pauvre), d ungal n Mulud Ferεun, yettwasnen s tuget arnu ɣur-s d win yettwaɣran s ṭaqa deg umaḍal s lekmal i wumi xedmen tasuqilt ɣer waṭas n tutlayin-nniḍen, abḥal, tutlayt tajapunit, taεrabt, tagnizit, tamaziɣt, talmant… d aḍris yesεan zhar! Ungal-a yessewhem akk wid i t-yecban! D tudert taseklant. Amezruy yettalles-aɣ-d ɣef ilemẓi ixedmen d aselmad deg wakud-is, yuzen ungal-a ɣer uxxam n teẓrigt Edmond Charlot, ur as-d-efkin tiririt ur as-d-nnin ma yelha neɣ ixus.
Deg useggas n 1936, deg Lezzayer tamaneɣt, deg ubrid Charras, mass Edmond Charlot d win yeldin tamkerḍit tamecṭuḥt i wumi yefka isem ” agerruǧ n tidet ” ( la vraies richesses ), arnu ɣur-s d axxam n teẓrigin, din id yessufeɣ Albert Camus, Jules Roy, Emmanuel Roblès, Albert Cossery, Jean Amrouche …artg
Deg Lezzayer tamaneɣt, Edmond Charlot d win i wumi d-zzin imyura izzayriyen akked wid n yillel agrakal, yebɣa ad yili d tiɣri n yedles-a icudden gar yillel agrakal d tefriqt n ugafa. Gar iεeggalen n tesqamut n tɣuri n teẓrigt-is yella Jean Amrouche, d aneɣmas arnu ɣur-s d amedyaz ameqran. Ungal yesεan azwel ” Fils du pauvre” n Mulud Ferεun yewweḍ ɣer Edmond Charlot.
Ur telli d tafaska imi axxam n teẓrigt-a d win id yettaṭaffen yal ass d iεecraten n yidlisen. Jean Amrouche d win yettwaxtarren iwakken ad t-iɣer arnu ad t-yektazel. Mi tyeɣra, yura acekti fell-as, yugi ad yessufeɣ ungal-a n “mmi-s ugellil” , s tismin taseklant neɣ ɣef lexsas n cbaḥa-s ?
Imi yura acekti-ya, Le Fils du pauvre ur yettwaqbel ara sɣur bab n uxxam n teẓrigt Edmond Charlot i yellan deg Lezzayer tamaneɣt.
Mulud Ferεun yeddem rray iwakken ad t-yazen ɣer teẓrigin “Cahiers du nouvel humanisme, Le Puy,” anida i d-yeffaɣ, εeddan iseggasen yufrar-d deg waṭas n teẓrigin-nniḍen. Γef wakka timenɣiwt n wungal-a sɣur Jean Amrouche d tin d-yufan tudert, deg tama-nniḍen lmendif aseklan d win yezeglen Le Fis du pauvre! Ungal-a ad yeqqim ilebda d agarruǧ aseklan amaḍlan.
R.H
