Deg wayen umi yessawal udabu azayri ” Amennuɣ mgal rebrab”, yesnulfa-d lqanun amaynut ara d-yeslalen yiwet n tesqamut taɣelnawt i wḥawec d usegrew n isallen ɣef yiminigen, tasqamut ara yilin seddaw n yiɣil n yigen azayri ( armée algérienne). Isalli i d-yersen deg weɣmis unṣib, yumayen-a.

Deg walɣu i d-tura l’APS akken ad tezzenz lqanun-a amaynut ara yernun, acuddu i tyersi n wertilelli i d-yefser udabu azayri ɣef iɣerfan i tceggeb, yenna :” Tanaḍt-a tla iswi n useɣnew n yiwen umetwi aɣelnaw n usekker n telɣa n yimsiklen yerna yesbeḍ tuɣdaḍin-is, asuddes-is akked umuzel-is, yemla-d ametwi-s. Ametwi-ya deg-s yiwen n ufecku agargzuman n usenned deg wayen yerzan aḥezzeb akked umennuɣ mgal n tremɣa akked tinnɣi tagraɣlant yeddsen akken bɣunt ilint telɣa-s. Ametwi-ya, yers s idis n uneɣlaf Amenzu, deg-s yiwen n usqamu n uwelleh akked tuqqna, semman-as « asqamu », d yiwet n teyunt taɣelnawt n telɣa n yimsiklen, i wumi semman « tayunt ».

Wid yeṭafaṛen annar aserti azayri, zṛan belli tasqamutt-a, tella d takmamt nniḍen, i wakken iɣerfan n lezzayer ad agaden ad fɣen s iberdan, ladɣa imi tadamsa send anfafad-a n covid-19 d tin yenṭarren, yir liḥal n tudert, isafaren n tgulla akk rnan deg ssuma, wiyaḍ ulac anda ara ten-id-taɣeḍ, ilmeẓyen yefɣiten usirem, ɛemden ad ten-ččen iselman n yilel agrakal, wala tudert n ddel, seddaw n uḍaṛ n uɛeskri.

Ar ass-a akk leqwanen-a i d-tettarew teɣlist tazayrit d tadist n yigen azayri, d ayen ladɣa yerzan imeɣnasen n teqbaylit, imi mači d yiwen mači d sin i sseḥbasen deg umnafagen n lezzayer, ama ussan-a ineggura ama si zik.

Nebla ma nettu ula d iqbayliyen yettinigen s wudem yellan beṛṛa n lqanun neɣ wid umi neqqar “HARRAGA”, yettqaqar-iten udabu azayri, yal ddurt tiliẓṛiyin tizayriyen, ttadrent-ed s zzux ” aseḥbes n imeɣnasen n MAK, yettheggin ad ḥeṛqen”, gret tamawt, akken ar ɣer-sen “MAK” yebɣa ad d-yini “IQBAYLIYEN”.