Zahir Moulaoui : amsaltu n “ḤIRAK”, sbabben-as attekki ar “MAK”
amdanamdan30@gmail.com
Zahir Moulaoui, amsaltu-nni yeddan deg umussu n yegduden izayriyen d-ilulen deg Furar 2019, yesbab-as udabu azayri attekki ar umussu n “MAK” yerra d tuddsa tarebrabt deg wagur n mayu yezrin.
Zahir Mulawi, Amsaltu aqbur n tama n bgayet, gar imenza i bedden ar yidis n wegdud asmi d-yekker deg fuṛar 2019 mgal tasnaraft tazayrit ilmend n tlelli d tugdut, yettwaṭṭef sɣur iɣallen n laman izayriyen deg tikliwin n 5 tuber yezrin, tikliwin umi qqaṛen “Ḥirak”, maca qasen ktalen, gguman as ḍelqen armi s-sbabben ayen ur yeṛǧi ara. Zahir yekcem d aḥirakist , yeqqel d amakist, netta yefkan tudert-is i tɣellist ass-a ḥesben-t d arebrab.
Skecmen-t s wudem unṣib ar lḥebs ass n 11 tuber yezrin sɣur unezzarfu neɣ juj n teɣdemt n Sidi Mḥemmed deg teɣremt n Lezzayer, deg temsalt umi semman ” Tarbaɛt yettheggin zzeḍmat timselḥin”, tikerkas d-fesren deg saru n 14 n tedqiqtin, anda ẓḍan lekdeb d asaru, akken ad ssegnen iqbayliyen d izayriyen.
