Aṭas n isebtaren deg Facebook, d waṭas n wudmawen yetwasnen i d-yemmeslayen ɣef wayen d-yenna mass Bengrina deg temlilit-is deg yeɣrem n wehran iḍelli n 23 Fuṛaṛ, anda i d-yewwet deg yemdanen i d-yefɣen ar iberdan deg umuli wis sin n “wembiwel azayri”, anda i s-isemma “Ḥirak Ddecṛa”, anemek-is ” TAGRAWLT N TADDERT” deffir wawal n Taddert, negza yakk belli i qesd-d Tamurt Taqbaylit, maca nnig n usenqed deg wayen d-yenna, amahat argaz agi asneslem amsɛeṛbeb yenn-ad kan s uɛeggeḍ ayen akk tettcxemmim tugett n izayriyen s tufra ?

Mass Bengrina am yakk isertaten izayriyen yezṛa, belli tugdut d tin ara yerren azal i tugett(Izayriyen) mgal tadersi n yeqbayliyen ( minorité kabyle), d tagi i d tilawt ugin ad walin isertanen imagdayen sumata d isertanen iqbayliyen ladɣa. Acimi tidderɣelt-a sdat n tilawt qessiḥen am tagi ? ma d timeẓrit ur zṛin ara imi teksasentt tmusni, wicqa ahat ad uɣalen ad fiqen, maca ma yella ẓran, acukan ssusmen, ɛemden agdud aqbayli ad yeddu ar ubaṭwar nebla ma nnan-s hemma, ayagi d lɛib fell-as, azekka agdud d win ara ten-iḥasben.

Naima SalHI, Djabellah, Makri, Khettal, Samir Belarbi, Rachad, artagara d ayen akk i d-nnan yakan. Ass-a gzan iqeddacen-a n tesnaktit taɛrabt-tisneslemt, belli ur d-yettawi ara cwal s srid mgal adabu n lezzayer, imi aneggaru yagi yefkan d asfel aḥric n ttrebga i tesnektit-nsen d win i d-iṛebban ass-a iglafen n yemdanen umi qqen-ent wallen sdat n nnger i ten-yeggunin.

Akayad n tefranin d win ara rebḥen isenselmen imsɛerben s sshala, imi agemmuḍ d win yeddan yid-sen, ɣef waya sganayen imagdayen iqbayliyen ɣef uheggi n tefranin ayen rran d azwel n tugdut. Anwa asertan aqbayli i yzemren ass-a ad yerbeḥ tifranin beṛṛa n tmurt taqbaylit ? ulac ula d yiwen, nwala ikabaren d isertaten yettwaḥesben ɣef tmurt taqbaylit, am RCD d FFS neɣ Khaled Tzaɣart d Karim Tabu, ur zmiren ara ad kkin deg tmesbanit anda ulac taqbaylit beṛṛa n tlisa n tmurt taqbaylit.

Ihi, amennuɣ n tidett deg lezzayer n wass-a mačči ɣef tugdut maca ɣef uɛiwed d wallus n ljerya n uwanek azayri, anida ilaq ad yili wemḍiq n teqbaylit, ayen-nniḍen yakk d timucuha.