Acraḍ arusi SPUTNIK V, d win i jebden lwelha n umaḍal akken yella, ussan agi ineggura ladɣa send tufɣa n tesɣunt n tezmert taglizit , yesɛan azal muqren deg uḥric agi n tsekla tusnant d tujya, tin umi qqaren THE Lancet, anda i tesnimmer asnulfu yagi, yufraren, win umi tefka agemmuḍ igerzen n 91,6, ayen ara t-yerren deffir kan n wecraḍ, Pfizer-BioNTech akked AstraZeneca.

Zrin ɣef wass-a azal n 63 n iseggasen asmi Rrus tceggeɛ s igenni asatilit SPUTNIK I, ass-en isuvyatiyen ssawḍen ad sneḥcmen Marikan, beggen-asen-d belli d nutni i d imenza deg temzizzelt n tiknulugikt, akken ula d ass-a i ttḥulfun irusiten, s yiwet n tmendit d rrezg, nnan-d u umaḍal akken yella, belli Rrus snen ad snulfun timsal-nniḍen mači kan ala Vudka, Pitṛul d Kalacnikuv.

Ayen ara yeǧǧen acraḍ agi ad t-ɣunzut tudsiwin n tezmert meṛṛa, d aseqdec n tsertit deg udellel i yellan fell-as, ladɣa sɣur uselway Arusi, i d-iberḥen yakan deg wagur n Ɣuct, belli teddez tebrez, d tamurt-is i rebḥen timzizzelt ar usnulfu n wecraḍ ara yesnegren anfufed n Coγid-19, ayagi arnu-y-as aɣiwel n usufeɣ-ines s wudem adamsan, send ula ad ifak weswir wis krad(3), n snesla n usenqed d unadi i yilaqen send asufeɣ n yal acraḍ deg umaḍal, aswir wis krad yesra i ujerreb n wecraḍ-agi ɣef anda ulac 15 000 n iwiziwen, ayagi d ayen ur d-nelli ara.

Ayen deg d-yufrar SPUTNIK V, ɣef yecraḍen-nniḍen !

Tamsal akk ara t-yeǧenn ma yeḍḥa-d d tidett yufra ɣef yecraḍen-nniḍen ama d Pfizer-BioNTech d AstraZeneca, deg tazwara acraḍ-agi Arusi ur yesri ara ad tcerḍeḍ fell-as snat n tikal, imi yiwet kan ad t-tekfu akken tafekka n wemdan ad tezmer ad temmager avirus n covid-19, ayen nniḍen d allalen n weḥraz-ines, imi afrijidir mezziyen ad d-yekfu, ur yesri ara i tfasniwin n tasmuḍi muqqren am wiyiḍ, deg tagara ssuma-ines, imi ger yakk tecraḍ d-yennulfan d netta i mezziyen akk deg ssuma, azal n 8 yuru kan.

Ayen ara yeǧǧen imdanen ad kukrun SPUTNIK V !

Aṭas n tuffirin i mazal ad nessin fell-as, ama tigawt-ines ɣef wenfuded n uvirus covid-19, ma d win ara tt-igezmen neɣ ur yesɛi tazmert ɣef waya, akud ɣef useḥbiber-ines ɣef tfekka ma mezziyet neɣ meqqret, deg tezrawin i d-tessufeɣ tesɣunt The Lancet, imuḍan d wid yettwaḍefren 4 n ledwaṛ kan, ayen mezziyen ma nessemgerd-it ɣef tezrawin yecqan acraḍ-nniḍen, ula d aseḥbiber ɣef wid muqqren wid i ɛeddan 60 n iseggasen, mači d win i d-tessefreẓ tezrawt agi, acku ala 10% kan i yettekkin degakka imdanen yettwacerḍen.

I Lezzayer deg wannecta-yakk ?

Tamurt n lezzayer am leɛwayed-id d taneggarut deg yal taɣawsa, asmi iduba n umaḍal merra gan timzizzelt anwa agdud ara icerḍen d amenzu, nekkni imiren aselway n lezzayer wwin-t ar tmurt n Lalman akken ad yejji, ma d agdud, nnan-as” Yettif Xir ad yemmet deg ccer wal s uvirus n covid-19″ wagi d ameslay n uneɣlaf azayri, ihi asmi d-ukin ufan akk igrawen muqqren ifermasiyen i d-igan acraḍ agi yuɣ lḥal lhan kan deg yegduden n ugafa.

Lezzayer tuɣ-ed 50 000 n tjeqmin n wecraḍ arusi Sputnik V, tineggura yagi terna-d 50 000 n tjeqmin-nniḍen n AstraZeneca, u tberḥed beddu n wecraḍ ɣef wudem aɣelnaw ass n 30 deg yennayer yezrin, maca deg ubdil ad zwaren deg wid yenṭerren nutni lhan-d deg sertanen n wexxam aɣerfan d ineɣlafen d isertaten, imi ar ɣersen ameksa yezwar tiqeḍɛit.