LIBYA :Talalit n tegduda tamaziɣt d tmendawt-ines
Send timlilit n FESSAṬU ( JADU), iḍelli n lexmis 28 yennayer 2021, gar iselwayen n tɣiwanin timaziɣin, d yemḍebren n wesqamu unnig n imaziɣen n Libya, akked imeɣnasen n izerfan n wemdan d wudmawen n tmeti tamaziɣt n Libya, fɣen-d akk wigi s walɣu ar d-yeqqimen deg mezruy n tmazɣa d tefriqt n ugafa, anda i d-begnen tugin-nsen s wudem unṣib n usenfaṛ n tmendawt i d-ihegga udabu uɛḍil n Libya, u diɣ ssawl-en i yakk imaziɣen ad gezmen attekki-nsen deg tefranin n tmendawt ara d-yilin ussan i d-iteddun.
Maca nnig n usiwel ar unegzum n uttekki deg tmendawt agi n lkerhegga d miḥyaf mgal imaziɣen n Libya, i d-ihegga udabu uɛḍil n Libya yettaɣen awal am wafus yeṭṭef uderɣal sɣur adabu asertan n Tmurt n Maṣer, d lebɣi n imaziɣen ad afen tifrat s ufus-nsen i twaɣit ttidiren d iseggasen aya.
Deg walɣu yagi begnen-d i umaḍal sumata d ilibiyen ladɣa, lebɣi-nsen n usbeddi n tama tamaziɣt s wudem unṣib ara yuɣalen d awanek s talɣa tagdudant ara yesɛun tamendawt-ines ɣef wacu ara yebdu leqdic deg ussan i d-iteddun, akal n tegduda tamaziɣt talibit ad tili ladɣa deg Adrar n Infusen akked d At Willul ” Zwara”.
Isalli am wagi d ayen ara yesfeṛḥen ladɣa iqbayliyen, wid mazal yezdeɣ ukukru deg tikli n usbeddi n uwanek aqbayli, ayyuz i yimaziɣen n libya wid ara ikecmen ar umezruy s tewwurt hrawen, afud i nutni tamurt taqbaylit d tin kan ara i bedden ar yidis-nsen i lebda.
