Deg temlilit-ines akked tɣamsa tazayrit, aselway n lezzayer Abd El Maǧid Tebbun, yefren ad yemmeslay iḍelli akken kan tekfa tmesbanit tamuqqrant n yeqbayliyen deg tmannaɣt n Fṛansa “Paris”, anda i d-yuɣal ɣef MAK ( Amussu n wefraniman aqbayli) d uselway-ines d waṭas n temsal-nniḍen tid ɣef wayeg ara d-nemmeslay deg weḍṛis-a.

Deg meslay i d-yefka Tebboune i tɣamsa tazayrit, yuɣal-ed ladɣa ɣef tmurt taqbaylit, imi d nettat i ceɣben axemmem n udabu azayri aguren-a ineggura. Am yal tikelt, tikerkas d tid yesseqdac udabu azayri, imi deg Magu 2021, deg asmi ssersen amussu n MAK d tuddsa tarebrabt, ar ass-a ur zmiren ara ad mudden ula d tazwara n ttbut deg waya.

Ar Teboune, Ferhat Mehenni ilaq ad t-id-ceyyeɛ Fransa akken ad yexdem deg-s udabu ayen yebɣa, yettu akken taɣdemt timunent ur tettwali ara asuget n yemdanen maca d ttbut kan i d tidett ayen nniḍen akk d ashitrfe. Lezzayer s yigen-ines, s srabes-ines, s iḍebbalen d tɣamsa-ines ar ass-a ur ssawḍen ara ad qenɛen ula d yiwet n tuddsa tagraɣlant akken “MAK” d tuddsa tarebrabt.

Ttbut n srabes izayriyen, d tikerkas-nsen “DEḤDUḤ” n Swamaɛ, d usaru-nni (-12 ans) i d-sɛedda lezzayer ussan yezrin, meḥsub “ULAC AKK TTBUT”, Tikli n yiḍelli deg Paris, i d -yesduklen ugar n 50 000 n yeqbayliyen d tin yesxerben lexyuḍ n Tebboune, ladɣa imi i wala “Ferhat Mehenni” deg tlemmast n tikli-ya netta d wegdud-is, ayen d-yezzakanen belli iqbayliyen dduklen, heggan iman-nsen akken ad qablen s wezday n lqed tixidas n udabu azayri mgal Tamurt Taqbaylit.

LEKDEB IMZENNAQ, ACBAYLI YEṚṚEẒ ZZIT TƐELLEQ....

Awal i d yenna uselway n Fṛansa Emmanuel MACRON : “Aɣlan azayri, d tamhersa tafṛansist i tid-yesnulfan”, d awal i d-yeffin ayeddid n lekdeb d tkerkas ɣef wayeg tebna “Lezzayer Taɛṛabt-Tisneslemt”, Tebboune, akken ad yer i wselway n Fṛansa, yesseqdec lekdeb annect n lezzayer. Acku, yennak aselway n USA George Washington i mud tarzeft i Limir Abdelkader; Acukan yettu belli aselway n Marikan yemmut deg 14 Duǧember 1799, meḥsub 9 n iseggasen send ad d-ilal limir-nsen. lekdeb am wagi yesbeggin-ed snat n temsal :

1- Ulac ula d yiwen n ttbut ɣef tilin n “Weɣlan Azayri”
2- Tebboune, ur yettqadar ara agdud-is, i ḥesbit d aɛeggun ara yamnen akk ixuṛṛiḍen-is, imi sɣur-es kan i d-usan

Tebboune yesseqdec Amirouche d Na Faḍma N Summer akken ad yeɛfes ɣef warraw-nsen

Teboune” Amirouche At Ḥemmuda d Faḍma n Summer ad qelben deg zekka-nsen lukan (ad walin amennuɣ n yeqbayliyen n wass-a)”. Lekdeb imzenneq nniḍen, yettu belli d netta i yerran ar leḥbus-is “mmi-s n Amiruc”, ar ass-a n wussan mazal taɣdemt tazayrit tettazzal akken ad tessekcem ar lḥebs Nurdin At Ḥemmuda, yeffer belli ijadeṛmiyen d BRI ẓedmen ɣef yexxamen yessi-s n Faḍma n Summer, ama d Kamira Nat Sid ( Tfilkutt) neɣ Katia Allik neɣ Wissem NASRI akken ad tent-yerr ar leḥbus-is. Imeɣrasen n tegrawla n 54, ad qelben deg ẓekwan-nsen, lukan ad walin luluf d igiman n warraw-nsen yettmettaten deg ilel agrakal akken ad rewlen ar Fṛansa ssufɣen iḍelli, ad qelben deg ẓekwan-nsen lukan ad walin miḥyaf i d-yeɣlin ɣef warraw-nsen, ad walin tiwinas n yeqbayliyen yeččuren leḥbus n lezzayer n wass-a.

Awtul n beṛṛa, izem n wexxam...

Teboune deg weshitref-ines, yessaweḍ armi yeggul ad “Yexdem Ṭrad ur nḥebbes ara” i Merruk, imi ar ɣur-es, yesɛa igen iǧehden i zemren ad yessexleɛ akk timura n ilel agrakal. Imeslayen am wigi ttbeggin-ed belli adabu azayri ɣef yexf-is Tebboune d Cengriḥa, d win ara yawin ar wesyax igduden yettidiren deg “Lezzayer”, imal-nneɣ yezzaknit-id iḍelli usalway n lezzayer, d imal n idammen, lbaṭel d leḥbus. Ihi ass-a iqbayliyen ma qqnen imal-nsen ar lezzayer yegguniy-aɣ nnger d twaɣit, abrid d win i d-zaknen yeqbayliyen i d -yefɣen s igiman iḍelli deg Paris, d winna i d abrid n tlelli d liser d talwit, ahasan yiwwass !