Athmane Bessalem d yiwen n umastan ilemẓi, u ladɣa d ameɣnas n izerfan n wemdan d teqbaylit, yettekki deg yiwen weskasi yesɛan azal d ameqqran , gar-as d yiwet n tmeṭṭut yettmeslayen s yisem n ukabar isneslem, yessedu BENGRINA win umi qqaren “lebni”, ayagi yeḍra-d deg yiwet n Tlizri umi qqaren “SALAM” , tadwilt ” ULAC EL MUǦAMALA ” neɣ ” ULAC ASEMLEḤ” i d-yettheggi Xellaf BEN HEDDA, d tagi i d tawlift tamatut n tedyant agi.

Askasi yella ddaw n usentel n “TALAKT” ladɣa ayen yeḍran deg Taddert n AT WAƐBAN, asmekti kan ɣef temsalt agi, d imi ass n yennayer deg lǧamaɛ n taddert sɛeddan-d tizlitt n Da Sliman AZEM, mači d asiwel i yenselmen maca d azuzen n teqbaylit, simi i d-ffeɣ tvideyyut agi, tesseker aḥraḥu deg facebook,akk izzayriyen kren-d mgal tamurt taqbaylit, ad nini kan tidett ulka d waṭas n yeqbayliyen “igdudanen” wwten-d deg temsalt agi, ttun akken tuddar di tmurt taqbaylit d tilelliyin.

Ihi, Athmane Bessalem, deg meslay id-yewwi deg uskasi agi, s tebɣest meqqren d waṭas n ṛẓana, yezzaken-d amgired ameqqran, yellan ger snat n tmetiyin d sin yegduden, u simmal i teddu wakud simmal ttibɛid-ent ugar.

” S rrezg muqren i lliɣ d yiwen ger warraw n tmurt taqbaylit anda, tella tlelli n ddin d usenqed-is, yal wa yettidir s wayen yettamen, di leqder d talwit d tegzi” d wagi i d ameslay n Athamen amahat win i t-id-iqublen ad yezgu acu i d taqbaylit.

“Nek umnaɣ akken awanek ur ilaq ara ad yesɛu kra n ddin, ɣef waya nek mgal asaḍuf i yerran tineslemt d ddin n uwanek” d tagi i d tikti n tebɣest i d-yenna Atman s waṭas n tebɣest deg yiwet n tilizri yettmeslayen i yizayriyen, deg tegnitt anda imeɣnasen ttwarfaden ar leḥbus, netta ad yaru umezruy akken yezzakn-ed tiktiwin-ines d wakud agi.

Tameɣnast tisneslemt i t-id-iqublen ur tesɛi aswir ilaqen akken ad temmeslay ɣef usentel yecban win n “TALAKT”, ur tezmir ad teffer lkerhegga ines mgal tikti n “TEQBAYLIT” ar ɣur-es ulac tamurt taqbaylit acku idles aqbayli ar ɣur-es d “PANACHI” , amahat ulac acu ara yarǧu weqbayli deg yemdanen i teddun deg terga yagi n tisneslemt, aɛni yettxalaf mejjir aẓar ?

AT1301240121