Ussan-a ineggura anfafaḍ n Coγid-19 d win d-yuɣalen s lǧehd deg ukkuẓ n tɣemmaṛ n Tmurt Taqbaylit, sbiṭarat n tmurt yekfa deg-sen uksijin, imuṭan ṭupṛen ulamek nefsen, yal tama d imeṭṭi, ttmettaten yemdanen yal-ass. Ddaw n uɣilif-a i d-yeɣlin ɣef wegdud, aṭas n wudmawen yetwasnen d tuddsiwin yellan deg Tmurt Taqbaylit ssawlen-d akken ad yili unegzum n tikliwin n wass n lǧemɛa deg Tmurt.
Ass-a n lexmis 22 yulyu 2021, imastanen yellan d iɛeggalen n wegraw yekkatenɣef izerfan n imeḥbas n tikti n Tizi-Wezzu, sawlen-d deg yiwen wulɣu anda ssutren deg yimezdaɣ n Tmurt Taqbaylit ad gezmen tikliwin-a n wass n lǧemɛa akken ad sseḥbibren ɣef tezmert n weɣref.
Akken d-nura yakan deg tesɣunt-nneɣ, yir liḥala deg tella tezmert deg Tmurt Taqbaylit, tesra ad xemmlen imezdaɣ i yifassen-nsen, ad d-rren tuddsa-nni gan deg tazwara n wenfafad-a n coγid-19, s unegzum yak n usegrew n medden, d uheggi n iḥebbasen deg yal anekcum n taddert d izenqan n teɣremt. Azekka ad nwali ma agdud d win ifernen tudert neɣ d win umi dreɣlent wallen.
