Tuksa n teɣlent tazayrit, n lwert neɣ n seɛɛu, d asaḍuf ur nettɛeṭṭil ara ad yuɣal d tilawt, d qanun akken i t-id-zzenzen usawen mgal akk ” Izayriyen izedɣen beṛṛa n wakal azayri, wid i xeddemen mgal taɣlist n uwanek , d wid yekkaten mgal tadukli taɣelnawt tazayrit, akked wid yettekkin deg tuddsiwin tirebrabin”.
Deg wakud anida aselway n tmurt n lezzayer mass Teboune yessefsex Agraw aɣelnaw azayri, aneɣlaf n teɣdemt yesnulfa-d asaḍuf amaynut ara i ɛeddin nebla lemcawrat n wegraw-a. Asaḍuf am wagi d win ara i degren tikli n umezruy yakan yettɣawalen, ɣef wayen yerzan tamurt taqbaylit ayen ?
I wacu asaḍuf am wagi deg wakud anda, ulac ula d yiwet n tudsa yesɛan creɛ neɣ tin yebnan ɣef lebɣi d wefran n wegdud, yal win yeṭṭafaren annar asert ad yegzu belli, asaḍuf-a n tuksa n teɣlent yusa-d mgal imeɣnasen yettnaɣen ɣef tmunent n tmurt taqbaylit, send imi sekkren neɣ ɣelqen tilisa akken ur d-ttuɣalen ara iminigen-nneɣ, atan tura snulfan-d tuksa n teɣlent, ar ɣersen d ttawil ɣef wayeg ara frun taluft taqbaylit.
Tuksa n teɣlent i yigiman n imeɣnasen n tmurt taqbaylit d tin ara d-yesɛun s tidett, agdud wer awanek, ur nesɛi ara aɣlan ɣef wayeg yesteɛref wegraw agraɣlan.
Deg tazwara neqqar-ed iɣelbit ara teddu taluft taqbaylit, s tuḍiwin n yeɛdawen wala s tegzi n imawlan. Asaḍuf am wagi d win ara icerregen s wudem unṣib gar lezzayer d tmurt taqbaylit, amezruy ad yaru belli d lezzayer tunṣibt i yezzin s uzagur-is ɣef tmurt taqbaylit, acku taneggarut-a xas tra azarug-is, maca werǧin tessarem ad tezzi s weɛrur i yizayriyen.
