Ayalas tiɣremt gar usirem d unezgum.

Limer d lbɣi azzeka 22 furar 2021 ad yili d amulli amenzu i uɣmis tiɣremt i d-yufrarren 22 furar 2020. Ayalas-a d win yeslhay mass Fudil Mizali win yellan d anemhal n uɣmis “La cité” s tutlayt n tefransist, d aneɣmas yellan deg wannar deg yiseggasen n 90 ar ass-a, yettunefk-as-d laεqed s wudem unsib iwakken ad yeselḥu takbanit n yisallen i wumi yefka isem ” tiɣremt” d tasuqilt i yexdem i yisem n uɣmis-is ya n tefransist. Deg-s yesemlal-d agraw n wid yesεan tamaziɣt d tmaɣnest deg wulawen-nsen, ama d imyura ama d imsawden neɣ ulama d isdawannen, d ayalas amenzu s tutlayt n tmaziɣt deg tefriqt ugafa s lekmal, imi dda lmulud yenna : “win yebɣan tamaziɣt yissin tira-s” yewweḍ-d wakud-is anida tamaziɣt ad tili deg yiɣemisen arnu d ayalas aɣelnaw. Necrahen wulawen, ferḥen imaziɣen d acu aya ur yedwim ara aṭas n wussan, yelḥeq semmus 05 n wuṭṭunen ugin ad teǧen ad yesuffeɣ iwakken ad ikemmel amecwar, akken kan i d-ilul nɣan-t ! Timentelt neɣ dnub i as-d-sbubben d tin n :” Tira” nnan-as-d ilaq tira n uɣemis-a ad tili s usekil aεrab, imeslay akked ugraw-is, ugin ad efken tamεamrit d asfel iwakken ad d-ḥyun tutlayt-nniḍen.

Yura icektiyen, yesaweḍ imi yemlal d tmarrayt n tneɣlfa n yisali d acu lexber ur iban sani, asqamu unnig n timuzɣa d win yemlallen d yimḍebren n tmurt ɣef tezɣent yettidir uyalas-a, mass Arzki Durari d win yuran tabrat yeldin deg uɣmis d acu adabu yexdem rray-is yesεuẓeg ɣef tidet.

Ineɣmasen imeɣnasen d wid ikemlen amecwar yedren deg usirem, xedmen ayen i wumi zemren kemlen tasuffiɣt s tawil n uẓeṭṭa anmetti imi wḍen uṭṭun wis 100 , akka iwakken ad inin tamaziɣt tezmer i iman-is ad tili deg yal taɣult, sbegnen-d tabɣest tesεa tutlayt-a, am nettat am tutlayin-nniḍen deg tmurt azref-nsent yiwen, nettmeslay-itt ad tt-naru, d amecwar ɣef wacu ur d-yettili uwexxar, amennuɣ ɣef tutlayt, tumast, tigemmi, idles d umezruy s timad-is d ayalas.