Ass-agi ara yeldi creɛ ɣef tmettant n Hervè Gourdel, deg lezzayer ?

Ass-agi lwelha ad tezzi ɣer yeɣrem n lezzayer deg waxxam n teɣdemt n Dar El Beyḍa win yetwasnen ɣef prukurur-ines i ssutren lḥebs i lebda i ylemzi aqbayli n 23 n iseggasen, maca mačči d tamsalt agi ara yawin lwelha d tamsalt nniḍen tin umi zemmen tura ugar n 6 n iseggasen, tagi d tadyant n Hervè Gourdel, win yettwakren, send aki yettwakkes-as uqerruy-is sɣur agraw n irebraben “isenselmen” wid i semman i yiman-nsen “Ǧunud El Xilafa” neɣ iserdasen n lxilafa.

Tawacult n Hervè Gourdel d tin yurǧan s ccuq ad d-yaweḍ wass-agi ugar n 6 n iseggasen, ihi yewḍ-ed wass-is, ad tɛeddi deg creɛ anda ara tsel teɣdemt i 7 yemdanen yettekin deg tedyant agi anda ala yiwen kan n urebrab i yettwaṭfen sɣur yigen azayri wagi d Abdelmalek Ḥemzawi, ma d 7 nniḍen ad ttwacerɛen ur llin.

Taǧǧelt n Herγé Gourdel, amwelleh n idurar n 55 iseggasen, yettwanɣan deg ctumber 2014, masa Françoise Grandclaude, tenn-a i tudsa taɣamsant n fransa AFP ” Tawult-nneɣ tefreḥ nezzeh, imi i d-yewweḍ wass deg ara d-yili creɛ agi”, terna-d ” Ttraǧuɣ s ccuq ad zreɣ amek teḍra tedyant n wergaz-iw, sɣur imdanen ara d-zzaken teɣdemt tazayrit ass-agi, ladɣa sɣur arebrab-nni, imi d netta i d imdebber amenzu”.

Abdelmalek Ḥamzawi, ala arebrab agi i d-ṭfen izayriyen, u diɣ d netta i d iqarren deg yennayer 2015 ɣef wemḍiq anda tella tfekka n Hervè Gourdel. Wagi d yiwen ger wegraw i semman iman-is, “ǦUND EL XILAFA”, i ybuyɛen i tuddsa n ” Awanek Ineslem neɣ Daɛec”, d tin yukren ɣef leḥsab n srabes n lezzayer, afransi Gourdel, akken ad tesxedmen ger ifassen-nsen mgal Fransa, yellan tebda ṭṭṛad i Daɛec, ssutren i wselway afransi ad yegzem ṭrad agi neɣ ad nɣen Gourdel, d ayen i d-yeḍren send tuṭfa-ines.

Asmekti nniḍen, belli llan akked Herγé Gourdel 5 n yemdukal-is d izayriyen i yettwaṭfen yid-es wigi : Karim Oukara, Hamza Boukamoum, Oussama Dehendi, Amine Ayache d Kamel Saadi, acukan 14 n tsaɛtin send tuṭfa-nsen serreḥna-sen-d irebraben, dɣa d nutni i yessawḍen isalli ar iserdasen n lezzayer.

Ayen ur d-ibanen ara d tinekkit n inigi wis 7, ur yelli usalli fell-as, ama d acut d wayen iga deg temsalt agi, ulac diɣ isallen ɣef 7 n irebraben-nniḍen umi ḥekmen deg yeɛrar-nsen.

Asmekti-nniḍen d amek tella tmurt taqbaylit ussan-nni, ur ilaq ara ad nettu akken tamettant n Albert Ebossé, 23 Ɣuct 2014, teḍra-d kan kra nwussan send tukkerḍa n Herγé Gourde Ctember 2014. Ayagi d ayen yeǧǧan dunnit merra terra iqbayliyen d wid yessexdamen miḥyaf ( timenɣit n wemyurar aberkan) u diɣ d tamurt wertaɣlist s tmettant ufransi d tilin n rrebrab deg durar n tmurt taqbaylit. Aṭas n tuɣac tiqbayliyin i d-yemmeslayen ɣef tsertit agi n udabu azayri, mgal tamurt taqbaylit, imi ar ɣersen d tasebba kan i d tettaf lezzayer akken ad teččar neɣ ad twerrek idurar n yeqbayliyen d iserdasen-is, amahat ugaden ad d-ili tnekra-nsen mgal adabu.