Amager n tefsut : Imseɣret i twennaṭ n tmurt taqbaylit

Amagar n tefsut, d ansay yesɛan azal am win yesɛa yennayer, ar wegdud aqbayli ladɣa d yegduden imaziɣen sumata. D ass n tlalit n twenaṭ, tin ɣef wayeg sseḥbibiren yeqbayliyen d igiman n iseggasen deg wassmi tejna tudert, d tameɣra n ugama d yemɣan, azamul n tudert d unegmu.

Xas ulamma tatrara n iseggasen d tin i d-yeskecmen amaynut deg wansay n umagar n tefsut teḥrez tmurt taqbaylit acḥal d leqrun-aya, maca iziɣer-is d win yeqqimen ur yexbic ur yejṛiḍ, am akken tesfuggulen imezwura-nneɣ i d -yegra ass-a. Deg ukkuẓ n tɣemmar n tmurt taqbaylit, d yiwet n tmeɣra, d yiwen wansay, d yiwet n leḥmala n twennaṭ d ugama.

Taṛiḥant, Tiɣilt n Meḥmud, Iɣil Ali, Tiziṭ, Iwaqquren, Ǧeɛfra, At Wertilan,Awqas, Sedduq, At Yanni, anda teddiḍ ad temmagreḍ, ansay-a i d-ǧǧan lejdud, ansay n tlelli, win d-yezzakanen belli ansayen iqbayliyen d ansayen n talsa akken tella

Agdud aqbayli akked tmuɣli tawenḍant, mači armi fsin idurar n wegris i d-tennulfa, tella yakan d igiman n iseggasen, armi tuɣal d menwala d ayen xedmen imesdurar nebla ma faqen ɣef tatrara n tikli-ya. Amagar n Tefsut d tajmilt n yeqbayliyen i twennaṭ, maca diɣ d tajmilt i tudert zeddigen.

Cna, dderz d ucewwiq, d wagi i d aḥiḥa n tefsut, ar yeqbayliyen, iziɣer n wayen yedren, ticki ara yenser deg tfekka n wemdan neɣ n uɣersiw, mači d win ara iḍaɛen maca, d win i kečmen deg tseḍwa d yemɣan akken ad yili fell-asen d aɛessas, d rrezg i lebda.

Amager n tefsut, zik d agraw n taddart i t-id-yettheggin , ass-a d isquma n tudrin d tdukliwin tidelsanin tiwenḍanin,i t-yesfuggulen, ticki kan tɛellem, tefsut, tasemhut ( saison) n tayri d ijeǧǧigen, imsiɣren n tudert d tizzegzewt.

Aderyis, neɣ imenzi n tefsut, imensi n 7 yemɣan n teẓgi

Amagar n tefsut, ass n tlalit n ugama, d ass yesɛan azal, am netta am yennayer, ɣef waya agdud aqbayli yettheggiy-as, imseɣret-is, iniyen-is, tigawin-is d imensi-is. Imensi n tefsut d win yeddan akked seksu, maca deg seqqi-nes i yella umaynut, acku d tameɣra n twennaṭ, d aseqqi i d-yekkan ladɣa deg yemɣan n twennaṭ. Iqbayliyen, xeddemen asfel n uyaẓiḍ, s ubisaṛ (seksu s ibawen). D tagnitt n temlilit gar iɛeggalen n taddert d yemsebriden umi tga twennaṭ leɛnaya.

Aderyis, seksu yewwan s iraggun n izuṛan n uderyis ( Thapsia garganica), rennun-as timellalin tuffayin neɣ tikiwanin, akked 7 yemɣan i d-tteksen igerdan deg tegẓi, acimi d igerdan ? acku d tagnitt ad lemden tusna n yemɣan n tujya, wid yelhan i tgulla d win diri, d tusna ttleqqiment tsutwin tiqburin i tmaynutin, amyimi d tarzeft yettinigen gar tsuta.

Amagar n tefsut d wuṭṭun 7 !

Uṭṭun 7, yusa-d deg leqrun imenza n talsa, nettafiten ula deg tgelda n imaziɣen deg Maṣer, i d-yeǧǧan tafaska n 7 n wussan d 7 wuḍan.

Des ass n umenzu n tefsut ” Amagar n tefsut”, tiwaculin ttnekkar-ent zik, ttefɣent ar yegran d lexlawi, ttawin-t aɛwin yid-sent, igerdan d imawlan ttɣiman ar lqaɛa, tteglilizen ger yemɣan, akken ad zdin tafekka-nsen d tin n twennaṭ, d tagallit werǧin yella win i zemren ad yeṛṛeẓ. Deg weglilez gar yemɣan, ini-ten ɣemmun, tifenda ( parfums) ḍellun-t, d cfawat yettidiren i lebda akked weqbayli.

Amagar n tefsut, d amagar n tudert, d tigejdit ger tgejda n teqbaylit, i d-yettbegginen azal tesɛa twennaṭ deg tudert n wegdud aqbayli. ilaq yal taddert, yal iɣrem, yal tama deg tmurt taqbaylit ad tesfuggel ass-a, akken ad yuɣal d ass mači kan aɣelnaw aqbayli, maca d ass agraɣlan i lmend n ugama.