Tinmehla n yedles : timeɣnasin n tisɛurrebt deg tmurt taqbaylit

Anwa ur nwala yara tugnatin n iqeddacen n tenmehla n yedles n ugezdu n Tubirett, tidlisin n Imir Abdelkader deg fus, ferent-ent ɣef yemɣaren d igerdan deg taddert n tqerbuzt. Anwa ur neḥdaqqeṛ ara deg tugnatin am tidak, maca iseggasen ineggura akk tinemhalin n yedles d yegzuden n tmurt taqbaylit, nnulfan-d d imḍelleɛ n yeɛdawen, sfeglen aki i wayen ilaqen deg ceyyet, d uqezzeb, d usedrem n yedlen n Tmurt Takbaylit.

Ilmend n wass agraɣlan n tutlayt tayemmatt, ass n 23 Fuṛaṛ yezrin, tanemhalt n yedles n ugezdu n Tubirett Salima GAOUA, d tin i d-iheggan tuksa n sser muqqren ɣef teqbaylit. Acku tefren taddert akk meqren deg Tmurt Taqbaylit, akken ad tessefti lkerhegga-ines d tmuḥqranit tettawi mgal idles aqbayli. Terza ɣer taddert-a tferreq idlisen s taɛrabt ɣef yemɣaren d temɣarin ur nessin ara ula ad d-sneṭqen tafyirt n taɛrabt, ass agraɣlan n tutlayt tayemmatt.

Ayen yugaren, tamsalt n tutlayt taɛṛabt ur fehhemn ara wid umi ferqen idlisen-nni, d tamsalt n usentel n yedlisen ferqen. Deg timiṭ n tmurt taqbaylit, ass agraɣlan n tutlayt tayemmatt, ad tferqeḍ idlisen ɣef Limir Ɛebdelqader, win tessusef tmurt taqbaylit iḍelli kan send ad yekker mgal tanekra n 1871, asmi qrib tenger tamurt taqbaylit, netta i ceyyeɛ tabratt i udabu amhersan afransi, anda i d-iwet s leqseḥ deg wegdud aqbayli send ad yesmekti tagallit-is ad yili d aḥbib n Fransa i lebda. ma llant rregmat nnig tigi a tanemhalt n yedles ?

Mači kan ala tanemhalt n yedles n tubirett i d-yennulfan d taɛdawt n yedles-is, mmektit-d kan tanmehla n Bgayet yegguman ad tmud isem n ṬAWES AMRUC i wexxam n yedles n yeɣrem n Bgayet, neɣ dɣa wid akk i ten-yugaren Weld Ali Lhadi, umi qqaren ” BACAƔA”, yerran tanmehla n yedles n tizi-wezzu d axxam n ddel deg semsaxen iseɣ d teqbaylit. Ar melmi ara qqimen yemḍelɛen n yeɛdawen d tisfi deg uzagur n teqbaylit ?