Timeqbert n lbaḍnat: Adlis amenzu n umedyaz Ɛemmaṛ At Sliman

Timeqbert n lbaḍnat d ammud n yisefra i d – yessuffeɣ, ussan-a, umedyaz Ɛemmaṛ At Sliman, ɣer teẓṛigin GRAINE FERTILE.

D adlis amenzu s wayes yekcem annar n tira. Maca seg temẓi i tuɣ deg-s tmedyazt. Aṭas n tfaskiwin i deg ittekka. Yewwi daɣen ddeqs n warrazen. Maca ur iḥemmel ara ad d-iban, ad d mmeslayen fell-as deg tɣamsa.

Deg-wammud agi amezwaru, aṭas n yinnurar n tudert i yesserwet. Mi ara yessiked umdan s telqey ar tmedyazt agi, ad tt-yaf d tugna i d-tefka ɣef tudert n yal ass n tmetti taqbaylit, s wayen yelhan deg-s s wayen ur nelhi, s tlufa-s d tsiram-is.

Ɛemmaṛ At Sliman d amedya n tebɣest acku xas akken yu ɣ-itent deg tezmert, ur yebri ara i ṭṭbel deg-waman. Alla ɣ-is yettfeggiḍ d isefra.

Netta daɣ si tama-s yerra tajmilt tameqrant i wid/tid i s-d-yefkan afus n tallelt. Gar-asen : Tiẓṛigin GRAINE FERTILE i d-yessuffɣen yakan aṭas n yedlisen s teqbaylit, Muṛad Ḥewwasin, Buɛziz u Cebbi ( Bouaziz Ait Chebib), Amsedrar Aqbayli.

Awal n tezwert sɣur Buɛziz u Cebbi:

Seg zik, timetti taqbaylit d timetti timawit. Tebna ɣef-wawal. Awal deg-s d lemri i deg ara nwali ayen ak icudden ɣer tmeddurt-is: tilufa n tudert, idles, taɣerma, lqerḥ d tumert, inezgumen d tisiram.

Awal irefd-it usefru. Asefru izegr-ed timiḍa, yewwi-d yid-es amezruy-nneɣ, azbu-nneɣ mgal imnekcamen, tudert n tmetti d wazalen i ɣef tbedd, tutlayt d tnekkit-nneɣ.

Tamedyazt teḥrez amawal, tefka iman i Teqbaylit. Deg-s i d nugem allalen s wayes yegma yedles d tmeslayt-nneɣ.

Tamedyazt d agerruj n tmussni. Adif-is d tidmi taqbaylit. Teskan-aɣ-ed d akken Taqbaylit tezmer ad-terfed ayen refdent tutlayin nniḍen. Ihi Taqbaylit d tutlayt yeddren, tezmer i tussna , tezmer i yal annar.

Tamedyazt yes-s i ncerreg tagut di talliyin n ẓmek. Tefka afud i yiɣallen akken ad rẓen izugla.

Xas ulamma amaḍal yeqqel d taddart, tatrara tuɣ yal tardast, anegmu yewweḍ igenni, tamedyazt taqbaylit azal-is yezga meqqer. Tedda ɣer sdat , tekcem annar n tira, am wakken tefka i yidelsan nniḍen i d-tewwi seg-sen. Ulac win i izemren ad tt-yerr ɣer deffir.

Ar iḍ-a, timetti-nneɣ tessikid ɣer tamedyazt am win yeggunin aggur n lɛid. Asefru d aɣerbaz i deg d-nettagem timsirin n tudert. Tamedyazt d tafat yemmalen i uɣerman iberdan yessidiren amdan.

Awal-agi i d nezwer, d ayen ara naf deg-wadif n udlis: Timeqbert n lbaḍna.

Ɛemmaṛ At Sliman, icettel-ed deg-yimedyazen-nni yettleqqimen Taqbaylit deg-wawal d wazal. Amud n yisefra-agi yerna-d afud i tsekla taqbaylit. Am-wass-a, idles-nneɣ ad yafeg s wefriwen-is, ad yezdi lqed di ṛṛeḥba n yedles ameɣradan.