Deg wasmi yekcem Lounes hemzi lḥebs deg 8 Tuber 2020, agdud aqbayli sumata d wat Makuda Ladɣa werǧin ǧǧan kra n tegnitt akken ad d-begnen lɣiḍ-nsen, d ibeddi-nsen ar yidis n Lounes d twacult-is.
Xas ulamma kra kan n wussan yezrin yella usirem deg wul n yal aqbayli, akken ad ḍelqen i Lwennas, imi d aselway n lezzayer i d-iberḥen ɣef usufeɣ n imeḥbas isertanen s timmad-is, maca Lwennas ur terzi ara temsalt.
Ihi, Makuda ur tettṛaju ara tin n rebbi deg yal yiwen, acku Lwennas yettwakref deg lbaṭel. Amḍiq n Lwennas deg wannar aserti, deg plaṭuten n tiliẓriwat, anda ara d-yessegzi ɣef tektiwin tisertanin n tlelli d talwit yerfed. mači deg tebrek n leḥbas n lezzayer, maca amennuɣ ad yettwaḍfer alamma yufa tilelli-nes Lounes Hemzi, Djamal Azaim, d yakk imekraf isertanen n tmurt taqbaylit.
Tikli n yiḍelli tedda akken iwata, imdanen deg tikli ar tayeḍ yettimɣur wuṭṭun-nsen, tikli tessawal i weltm-as, usan-d deg yal tiɣmert n tmurt taqbaylit akken ad suɣen s yiwet n taɣect “Tilelli i Lounes Hemzi”, am yal tikelt tawacult n Lounes, d tin i ḥedren d tin yenneɛtaben, ayen i d-irennun tabɣest i ymesbaniyen, am akken i t-id-irennu wanay aqbayli.
Ar tagara tella am yal tikelt usedyeq ɣef kra n imeɣnasen deg webrid n tuɣalin, ad d-nuɣal ar isalli-ya deg tira-nniḍen.