Tasqamutt Taɣelnawt i tlelli n imeḥbas (CNLD), tga miḥyaf ɣef imeḥbas n teqbaylit ?

Aɣyul n vava d jeddi, nerna rrekba deffir, ihi akka i teḍra deg yeqbayliyen ass-agi, sɣur amussu ssarmen D ” Acmumeḥ”, armi yuɣal d askeɛkeɛ, d taḍsa n wuglan deg wegdud i ḥeqren iman-is s yiman-is. Neẓra yakk, “Tagrawla n wecmumeḥ”, tekker-d deg 16 Furar deg yeɣrem n Xeṛṛaṭa deg wul n tmurt taqbaylit, d asirem, amahat ad d-yeddu wegdud azayri afus deg fus akked wegdud aqbayli, ayen nwan waṭas n imeɣnasen yeḍra-d deg waguren imenza n tegrawla yagi.

Simmal teddun wussan, simmal yettban-ed belli d aɣebbar ar wallen, d tikerkas, imi iban-ed belli wid yedmen tasnektit ( idéologie), taɛrabt-tisneslemt tin yeṭṭuqten ger wegdud azayri, d wid yeẓran iman-is, yeẓra acu yesra d wacu yebɣa, maca agdud aqbayli i teddu kan, ar ass-a yessusem i tɣeẓẓaẓ n wallaɣ-is , yugad ad yesmuzget i wxemmem n tilawt, yugad ad i wali iṭij deffir n uɣerbal n timmundelt-is.

Melmi i ṛuḥ ad d-yedduqqes wegdud aqbayli, isenselmen ad refden tuɣac-nsen ad tesḍelmen send acuffu n uqendur ad s-inin ” Wa leqbayel, d kunwi i d at tirrugza, d kunwi i di izayriyen n tidett, ur ilaq ara ad txemmem i tesnektit (idélogie) acku yezmer ad tebḍu, lḥirak, ur ttagadet susmet, mmtet, nnaɣet tecki i d-tewwim tugdut ara ɣ-yessawḍen ar udabu imi d nukkni i d tugett, ass-en d nukkni ara wen-yefken taqbaylit-nwen”.

Wannag amek ara tegziḍ neɣ ara d-sfehmeḍ, tasusmi d wesmeɛẓeg n izayriyen ɣef imeḥbas n teqbaylit ?

Tasqamutt taɣelnawt i tlelli n imeḥbas , deg walɣu-ines n 6 Fuṛur, anda i d grew yakk “imeḥbas n rray”, deg yal agezdu ( Département), d tin ur d-yudiren ara ama d Lounes Hemzi ama d Ǧamal azaim, yerna agraw yeččuren tasqamutt-agi zaɛma d imeɣnasen n izerfan n wemdan, ulac ccek ad ilin gar-asen iqbayliyen d teqbayliyen, umi zemmen mačči d imi maca d allaɣ, wannag Djamal Zaim yettwaṭef ar lḥebs ɣef wayen yettxemmim deg ” Tneslemt” ma d Lounes Hemzi yettwaṭef ar lḥebs imi yettnaɣ akken ad yuɣal wawal i wegdud aqbayli ad d-yini, ih neɣ ala i timunent-ines ! ur tesriḍ ara ad tiliḍ d abugaṭu neɣ d asdawan akken ad tfiqeḍ belli d miḥyaf kan i yzedɣen allaɣen n yemnayen agi n izerfan !

Asteqsi aneggar i yat udmawen zuren, amek ara tafeḍ deg walɣu yagi n CNLD, isem n Abdellah BENAOUM, ameɣnas n tuddsa n RCAHAD tarebrabt, tin i d-yessawalen ar usefsex n lezzayer deg Xalifa tagraɣlant.

Abdellah Benaoum, arebrab isneslem tḥesbit CNLD d ameḥbus asertan n rray, ma d Lounes Hemzi, argaz n tlelli d tsertit i yessawalen ad yuɣal wawal i wegdud tessusem fell-as.

Xas ulamma, ulac win umi nessaram lḥebs, ulac win iwatan ad yekcem ar lḥebs imi kan yesɛa tiktiwin ur ɣ-yehwin ara, maca abeddi yagi d tayett n, yessemgiriden gar wigi d wiyaḍ ɣef laǧal n tesnektit, neɣ ṛṛasa neɣ yedles neɣ tnekkit n yemdanen d miḥyaf arzagan i yilaq ad yessusef u ad d-yeggurreɛ yal ilelli, yal amdan.