ASDUKKEL N IƔALLEN N YAL AMEƔNAS AKUṚSIKI

Deg useggas n 1992, yuɣal-d Edmond s wudem n tifrat d wesdukel n yal ameɣnas yumnen s weɣlan akuṛsiki, abrid n tifrat deg usemmeḥ ger yal win yettnaɣen ɣef uzekka n tlelli i tmurt takuṛsikit, xas ma mxallafent tiktiwin, xas ma mgaraden wallalen n umennuɣ d takuṛsikit id-yessawlen.

 

Ihegga-d i lmend n yeswi agi n tdukli yiwet n lejrida umi isemma “Unione Naziunale = tadukli taɣelnawt” anda id-yewwi igemmaḍ igerzen acu kan di tallit nni, FLNC yekcem di tmenɣit n ikuṛsiken s timmad-nsen, wid akk ladɣa yeddan mgal-nsen, xas ulamma Edmond werǧin i-yessared ifassen-is si tikli n FLNC, maca diɣ werǧin i ten-id-yesnimmer neɣ icekkeṛ, ḍlan taswiɛt armi yeɛṛeq cced uyeddid, taɣlist txuṣ (manque de sécurité), tugdi tekcem ul n yal amezdaɣ n Kuṛsika, maca send tamettant n Ṛubiṛ Suzzi, yiwen n umeɣnas ɣef tmunent n Kuṛsika, ayen yeǧǧan Edmond ad yejbed iman-is deg ubrid agi n Tdukli taɣelnawt, imi ar ɣuṛ-s ur d-tegri tdukli akk d wid yessusmen ɣef lmut n umeɣnas-nsen, ayen i t-yeǧǧan ad yetaxer deg usqamu aɣelnaw akuṛsiki.

TAMSIRT N TUDERT, TAMSIRT I YAL AMEƔNAS N TIMUNENT

 

Deg useggas n 2014, FLNC yessers abeckiḍ, mmi-s Gilles, yessaweḍ ad yesdukel imeɣnasen n timanit d timunent ad ṭfen weḥḥed-sen Asqamu aɣeṛfan akuṛsiki, akka ayen ɣef wayeg yettnaɣ baba-s yessawḍ-it mmi-s d tilawt.

 

55 n iseggasen n umennuɣ, werǧin yuker aḍar ar deffir, werǧin i t-yeffeɣ leɛqel, ifaq weqbel akk imeɣnasen nniḍen akken abeckiḍ ur ibennu ara tugdut, ur ibennu ara tamurt, mer isuɣen awal tili aṭas n teṛwiḥin ara imenɛen, mer isuɣen awal tili aṭas aya deg tamurt takuṛsikit ad tedder s wezday n lqedd, ad tili d amedya i yegduden n umaḍal di lebni d tmeti n talwit, n tegzi d tugdut, tudert n Edmond Siméoni, d tudert n umennuɣ akuṛsiki d amedya i yal ameɣnas aqbayli, amedya n usirem maca diɣ amedya n ṛẓana di tikli d umennuɣ, d tamsirt deg umennuɣ i lmend n bennu d uwanek, i lmend n bennu n tagduda.

 

Ass-a xas mazal werɛad Kuṛsika ur tessaweḍ ara ar yeswi-s, maca tedda deg ubrid yessufuɣen, imi rran ẓẓeṛb ɣef tnekkit-nsen, d tutlayt d yedles-nsen, ulac tugdi fell-as, akka ula d nekkni ilaq ad neffeɣ di tirga n telli ar lebni n tlelli s yiɣil-nneɣ di talwit d lefhama, mačči s westixxeṛ d uqejjem  n wegdud, mačči s rregmat d usexleɛ n wegdud maca s tuṭfa n ufus i win ass-agi nenwa yeffeɣ i webrid, s uwelleh n win nwala yecceḍ, s lǧehd n tiktiwin-nneɣ d usenfaṛ-nneɣ mačči s tuzma d uḍeṛṛef n yal win ur neddi yid-neɣ ass-agi.

 

ANWA  I  D  EDMOND SIMEONI ?

Edmond Simeoni (IDMUN SIMYUNI), d argaz asertan Akuṛsiki, ilul-d ass n 6 ɣuct 1934 di CORTE di Kuṛsika n ufella, yiwen ger ibabaten n weɣlan Akuṛsiki Asmi yesɛa 20 iseggasen, yemlal Lucie (Lusi), akked yesɛa sin warraw-is ger-asen Abugaṭu d wergaz aserti, Gilles Simeoni, yeḍfeṛ aḥric n Gastro-entérologie, anda yella axxam n tujjya di Bastya deg useggas n 1965.

 

Yessuddes-d di yulyu 1970, Tigawt Tamawit Takuṛsikit ( ARC : Action Régionaliste Corse), yuɣalen deg useggas n 1973 Azzione per a rinascita di a Corsica ( Tigawt i tlalit takuṛsikit). Deg useggas n 1973 daɣen yeffeɣ-d ar webrid akken ad iberreḥ s lɣiḍ-is deg udeggeṛ n uberčix azeggaɣ deg ilel agrakal.

 

D argaz n talwit, win umi ur yettergigi ufus, Edmond Simeoni, isebbel tudert-is i tmurt-is yennuɣ tudert-is akk i timanit n Kuṛsika. Yegra-d deg umezruy, d yiwen ger ibabaten n “uɣlan akuṛsiki”, netta d watmaten-is, Max d  Roland.

 

Deg useggas n 1977, yessuddes-d UPC ( Tadukli n wegdud, akuṛsiki, union du peuple corse) d amussu n timanit. Di 1983, Edmond Simeoni yuɣal d Amwelleh di tɣiwant n Bastya (Conseiller municipal de Bastia), acu kan tazmert teǧǧa ifadden, yendeṛkal wul-is, ayen i t-yeǧǧan ad yejbed iman-is ɣef tsertit.

 

Des useggas n 1992, amussu-ines irebḥ-d 8 n ikersiyen di tefranin n tamiwin, di tesqamutt n Kuṛsika, maca Edmond Simeoni yetaxxeṛ ad-yezzaken ɣef aya akken yugi tasertit n ṭṛad n FLNC,

 

Di 2004, yiwen useggas islul-d tidukla “imdukal n kuṛsika”. 3 iseggasen umbeɛd deg useggas n 2007, akk d WAXXAM AKUṚSIKI yettekki deg usmekti n 200 iseggasen n Pasquale Paoli, anda diɣ yettekki di cadet ( GODF) deg uskasi ɣef imal n kuṛsika. Deg useggas n 2009, ihegga-d akk d l’IRCA, lqeṛn n Danielle Casanova, u yeslal-d yid-s, ASS  AGRAƔLAN  N  KUṚSIKA.

 

Akka deg ubabat n weɣlan akuṛsiki, ar umeddaḥ ur nzeggel ula d yiwet n tegnitt akken ad yerfed awal akuṛsiki, ad t-yezreɛ di yal amḍiq deg umaḍal. Edmond d win id-iṛebban tisutwin, ɣef umennuɣ akuṛsiki, ass-a yezmer ad yesgunfu imi axxam yeɛmeṛ, ayagi yettbeggin-d idles aserti yesɛa wergaz agi, ur nerri ara amennuɣ d ayla-s maca d ayla n yal amdan akuṛsiki, yessew-it, iḥuder-it ladɣa ileqqem-it.