ANAY AQBAYLI : ƔER KRA D ISEƔ, ƔER WIYAḌ D TUGDI

Amahat, twalam yakk neɣ teɣram akk tuksa yettwakkes wanay aqbayli iḍelli deg axxam n Da Lwennas i lmend n umuli ines wis 65, yerna amdan-nni i yugin anay iḍelli d winna i tyugin deg temḍelt-nni n yemma-s n Da Lwennas. Xas ulamma, ass-en aṭas n imeɣnasen i yfernen ad lummen BRTV wala Lsas Matoub, ihi iḍelli yekkes ccek ɣef uxemmem d tmuɣli n lsas agi, mači kan deg wayen yerzan anay aqbayli, maca deg wayen yerzan sumata asenfaṛ n weslali n uwanek aqbayli.

Send iḍelli deg tikli i d-yettwaheggan deg MAKUDA i lmend n ibeddi ar yidis n Lounes ḤEMZI, llan wid yugin ad ddmen kra n imeɣnasen anay aqbayli, xas ulamma Lounes Ḥemzi d imdebbeṛ deg mussu n MAK-ANABAḌ, maca xemmen ahat anay agi aqbayli d win ara d-yeglun s ccwal deg beddi agi ?

Amek i yezmer ad yuɣal wanay yellan d win akk i d-ilulen s tugdut ahat akk deg amḍal, ass-agi tkukra tiṭ ad tewɛu ? acu ibedeln deg wassen ar ass-a ?

Aṭas i yezran akken, tamsalt n wanay d azamul i ǧehden nezzeh, d tawwurt neɣ d tiseɣlit i d-yezzakanen tilisa n kra n uxemmem, neɣ kra n usenfar, dɣa deg lezzayer yebnan s tkerkas n USYIWWEN, yiwen ukabar, yiwet n tutlayt, yiwen ddin, yiwen wegdud, yiwet n tutlayt art.. mer ad jebdeḍ azamul nniḍen ur yellin ara deg lmul n tesnaraft “taɛrabt-tisneslemt” ad d-yeɣli igenni fell-ak.

Akka ihi, send agdud ad d-yesnulfu anay aqbayli, MAK yella d win i refden kan anay amaziɣ, deg tallit-nni, anay agi amaziɣ d netta i yellan d azamul n usenfar n timunent n tmurt taqbaylit, anwa yettun ula deg 2014 asmi adabu azayri, yenna-d deg tilizriwin-ines belli d MAK i yellan deffir n cwal deg TƔERDAYT, acku zaknen-d “anay n mak” ɣef yiwen wexxam.

Ula d ikabaren umi qqaren izayriyen ” IKABAREN IQBAYLIYEN” am RCD d FFS, tanmehla-nsen ugin ad zzin iman-nsen s wannay amaziɣ amahat ad cakten deg tzayrit-nsen, tikwal nsel menɛen s yiɣil imeɣnasen-nsen ad refden anay amaziɣ deg tmesbaniyin, ayen i s-yeḍran i ALAS DI TLELLI deg tikli n RCD, d amedya i d-ifeḍḥen ayagi.

Asmi i d-ilul wenay aqbayli deg 2015 s tefranin tigdudanin deg maḍal merra, ladɣa deg tmurt taqbaylit, d win yerran anay amaziɣ ad yettwaqbel, ddaw yifer n tudsiwin tunṣibin n lezzayer, acku ur yelli ara am zik d azamul n timunent.

Deg wasmi tebda ayen umi qqaren “TAGRAWLA N WECMUMEḤ” deg 16 Fuṛar 2019, iqbayliyen yeddan deg tweffa n tmesbaniyin agi n ṭmeɛ n ubeddel n yimal azayri, ɣuccen anay aqbayli, imi ar ɣersen d azamul n wemgired gar-asen d izayriyen, ɣef waya, imastanen wten imeɣnasen i tirefden deg Bgayet, ssufɣen-ten deg Tizi d wanda akk i d-yufrar wanay agi. “l’algérienisme” arḥifan, i d-ilulen deg tmurt taqbaylit deg 2019 d win yerran anay aqbayli ger wallen akk n wid yenwan ad mudden d asfel imal n tmurt taqbaylit ger ifassen n izayriyen.

ANAY AQBAYLI, yellan d iseɣ n yeqbayliyen ass-agi yuɣal d taɛkemt ɣef yiɣil-nsen, d tugdi neɣ d tasebba i wdabu azayri akken ad yeɣleḍ fell-ak tuccar n dreɛ d miḥyaf.

Acu i d-yewwi ɣef umussu aɣelnaw aqbayli ad tyeg akken ad ibeddel udem n tilawt agi ?

Anay akken ad yeflali d udem n tdukli ilaq ujajiḥ n tmest ad yeknef weqbayli akken ad yakwi d taqbaylit i d tifrat-ines ! ahat deg teswiɛt deg d-negra d aya kan i mazal ad yili d tasebba n usendekwel n yeqbayliyen, maca diɣ d imeɣnasen i ylaqen ad smeɣren lxaṭer-nsen, d nutni kan ara yessegzen i yeqbayliyen, belli anay aqbayli mači kan n umussu n MAK, maca n yal aqbayli iran ad yedder deg yimal n teqbaylit deg yiseɣ d liser d sser.

Tlaq tweffa n teywant muqqren ara yerren anay aqbayli mači kan d azamul n timunent maca diɣ d azamul n yimal, ayagi mači d takemmict kan i zemren ad teg maca s tdukli n waṭas n yiɣallen deg tegzi, tamusni d tdukli.

AT1649250121