Aṭas n wayen d-yellan deg wagur-a n yebrir, sɣur adabu azayri akken ad yessekker timest deg tmurt Taqbaylit, amahat ad yesettu aselqef-ines, neɣ akken ad yesɛeddi urar n tiddat i d-yettheggi, akken ad yeḍmen tudert ɣezzifen i netta d terbeɛt yesedduy d tin tyessedduyen, ilmedn n  usummu n wadif n yegduden yettidiren deg wayen umi semman lezzayer.

Tazwara tella-d deg tikliwin n 20 yebrir deg tmurt taqbaylit, anda deg tallit n “tnekra tazayrit” aṭas n tuɣac i yessawalen ar tagara d lmut n usenfaṛ n tlalit d usbeddi n uwanek aqbayli, imi ar ɣer-sen asenfaṛ-a ur t-id-yewwi ara umeddaḥ deg taqṣit acku iqbayliyen d teqbayliyin ar ass-a mazal ttamnen deg tudert deg lezzayer n tdukli gar yeqbayliyen d izayriyen-nniḍen deg tayri d tumert.

Maca tikliwin n 20 yebrir ladɣa tin n Tizi-Wezzu, tella d tisfi i targit-a ur nesɛi azekka, d igiman n yeqbayliyen i d-yerran i teɣri n teqbaylit, yal yiwen amek icebbeḥ ass-a, s ubeggen n lebɣi d neyya n umennuɣ ilmend n usbeddi n uwanek aqbayli imi ala aya i d tifrat i yzemren ad yeḍman imal i wegdud aqbayli deg teɣlist d talwit d tlelli d unegmi. Deg tazwara adabu s iserdasen-ines bɣan ad ɛezlen imeɣnasen n telli n teqbaylit akked d imeɣnasen imagdayen iqbayliyen, acku ǧǧan ineggura-ya ad ɛeddin, akken d-tewweḍ nnuba n imeɣnasen n tlelli taqbaylit tẓeṛṛeb fell-as s twinas n iserdasen.
Taqbaylit d tin yernan aɣunzu ger imaɣnasen yemgaraden timuɣliwin, acku imagdayen i ɛeddan yewḍen armi d annar n umenzu n umbir akken slan ɣef uneḥbus n imeɣnasen n tlelli taqbaylit, uɣalen-d ur ḍfiṛen ara tikli-nsen akken ad beggnen ibeddi am yiwen wemdan gar yak iqbayliyen akken tebɣu tili tmuɣli-nsen tasertant. D tamsirt n tdukli, i yeskecmen tugdi ar wul n udabu azayri, ass n 20 yebri 2021 ibeggn-ed i tikelt-nniḍen akken axxam aqbayli d yiwen, werǧin ad yezmer udabu ad iwet aqbayli s wayeḍ.

Adabu azayri d win ur neqbil ara tilawt taqbaylit, yettnadi deg wassen kra n weshitref ɣef wayeg ara yebḍu i lebda leṣfuf n yeqbayliyen, d wayen ara yessezdin izayriyen deffir-ines. Tawṛiqt n teɣlist d tdukli n wakal azayri, d tin yezga yesseqdac mgal tamaurt taqbaylit, i tikelt tamenzut deg mezruy anda taneɣlaft n temḥaddit tazayrit ad d-ger alɣu, anda i d berreḥ zaama, atan ṭfen yiwen n uɛeggal n MAK, i d-iqaṛṛen belli amussu yagi yettheggi tixazabiyin mgal izayriyen, anda d-yuɣ lbumbat d ibeckiḍen i wheggi n ẓẓeḍmat-a. Adabu yessemẓi deg tezmert n tmurt taqbaylit deg tdukli tecki d-yeɣli ẓmik ɣef warraw-is. Yenwa iqbayliyen ad agaden ashitref-a, ad zzin azagur-nsen i ymeɣnasen n tlelli n tmurt taqbaylit. Ayen ur yuṛǧi i d-yeḍṛan, tugett n yergazen n tsertit d yedles iqbayliyen beggn-ed ibeddi-nsen ar yidis n imeɣnasen n tlelli taqbaylit.

S yiwet n taɣect ama d Hend Sadi neɣ d gma-s Said, ama d Buɛziz At Cebib neɣ d Ḥemmu at Bumdin, ama d Xaled Tazaɣart neɣ d Ǧamal Zennati, ama d Salem Caker neɣ ula d Mezian Aban artagar… mači d yiwen i d-yessawlen ar tdukli d useḥbiber ɣef imeɣnasen n tlelli taqbaylit, msegzan akken llan, belli agejdur i d-yettheggi udabu s yimi n tneɣlaft n temḥaddit mgal tamurt taqbaylit d tadukli n iɣallen iqabayliyen de wemgired-nsen ara yili d taɣlist mgal-ines, acku ma neddukel ad nedder, ma nebḍa ad nenger.