Deg yiwet n tdiwennit akked d weɣmis amerruki le 360, i yettwazuzren deg internet ass n tlata 20 yulyu, Mass Ferhat Mehenni yuɣal-ed ɣef webdar n wezref n wefraniman n wegdud aqbayli, i d-jebden yemqedmen n merruk deg uxxam n leǧnas yedduklen, akked miḥyaf n udabu azayri metwal akk yellan d aqbayli ladɣa u d amaziɣ sumata.

Mass Ferhat Mehenni, yemmeslay-ed ɣef umezruy n tlalit n umennuɣ n wegdud aqbayli, ɣef lebni n uwanek-ines, yuɣal-ed ɣef miḥyaf n udabu azayri anda d-yuder “Ben Bella” aselway azayri amenzu, belli d netta i d aɛdaw unṣib deg tazwara, asmi d iberreḥ ɣef tiɛurbebt n lezzayer, nebla akk tinekkit nniḍen. asaru n wazal n 27 n Dqayeq, yewwi-d deg-s asaru n wefraniman armi d ass-a.

Aselway n MAK-ANABAḌ yuɣal-ed deg tdiwennit-a ladɣa ɣef ufus n tallelt i tmud tdiplumasit tamerrukit i wezref n tmurt taqbaylit deg wefraniman-is, imi anmahal ( ambassadeur) n Merruk Omar Hilal, d win i ferqen yiwen walɣu anda i d-yebder ” azref n wegdud aqbayli asaḍ ( héros), deg tlelli-ines netta yedren tamharsa yakk ɣezzifen deg tefriqt n ugafa”. Mass Ferhat Mhenni, icuf aqendur n ugellid amerruki, imi yerra tigawt-a ” d aḍu n tlelli amaynut deg tefriqt n ugafa, d tajbirt i yal tucḍiwin n umezruy….”

xas ulamma, tṛad-a tadiplumasit d tin ara d yeglun s uxeṣṣar ɣef yal imeɣnasen n teqbaylit ama d wid n timunent neɣ wid n timanit, acku llan waṭas yettxemmimen belli d tarzeft semmumen, i d-imud lmexzen i nned-is azayri. ladɣa send imi ijerred udabu n lezzayer amussu MAK d amussu arebrab. Ar izayriyen, d rray agraɣlan afus n tallelt n Merruk i tmurt taqbaylit d ttbut belli MAK d amussu aɛdaw i d-texleq lmerruk mačči akken ad yerfed tamurt taqbaylit maca akken ad yessedrem tamurt tazayrit.

Mass Mehenni, yuɣal-ed daɣen ɣef usemmi n tuddsa n MAK sɣur adabu n lezzayer akken d tuddsa “Tarebrabt”, ur d-yenni ara acu ara yexdem netta neɣ tuddsiwin yesedduy akken ad begnen udem zeddigen n umennuɣ n wegdud aqbayli, yenna-d kan belli deg yal tallit, adabu n lezzayer d win yettsemmin akk tuddsiwin d-bennu tmurt taqbaylit, d tirebrabin neɣ d tid yellan mgal aɣlan azayri d tneslemt d taɛrabt d rebbi artagara.

Ilaq ad nini kan yiwet n tɣawsa, tṛad-a tadiplumasit gar lezzayer d Merruk d tin d yewwin tafat ɣef umennuɣ n wegdud aqbayli, ass-a deg yal tamurt, taɣamsa-ines tettmeslay-ed ɣef wezref n wegdud aqbayli deg wefraniman, maca ilaq agdud aqbayli ad yegzi urar adiplumasi yettezzin deg zagur-is. Nezra yakk belli Merruk werǧin ad teqbel talalit n uwanek aqbayli, imi ula d nettat tesɛa tamurt n Rif i zemren ad tɛaned tamurt taqbaylit, maca amennuɣ- a gar iwunak-a i d-tesɛa temhersa tafransist d win ara d-yeglun amahat s yiṭij deg wudem n yegduden imaziɣen.

walit tadiwennit deg tazwara ar tagara