Taneɣlaft n yedles n tmurt n Fṛansa massa Roselyne Bachelot, tenn-ad ass-a n sem (ǧemɛa) 10 Bujember 2021,belli deg wussan i d-iteddun ad tili tulya n aṛciv ɣef “Testanin n teɣdemt” deg wayen yerzan ṭṛad n tmurt-nneɣ gar iseggasen n 1954 ar 1962. D ayen ara d-yeḍṛun ugar n 60 n iseggasen degmi tefra ṭṛad, deg yiwen wakud n ccwal adiplumasi gar udabu azayri akked tmurt n fṛansa. Ayagi yusa-d sin wussan kan deg assmi yerza yemdebbeṛ n tdiplumasit tafṛansist mass Jean-Yves Le Drian ar lezzayer.

” Bɣiɣ ad nessiked amezruy-nneɣ akken yella, imi ssames-sent s tkerkas armi yuɣal d tiyersi deg wallaɣen n yemdanen. Ur nezmir ara ad nebnu azekka n tmurt s tkerkas d txidas” D wagi i d awal n tneɣlaft n yedles afṛansi deg tiliẓṛi n BFMTV ass-a n sem. D isalli ara d-yeglun s waṭas n umeslay ama deg fransa ama deg lezzayer d tmurt taqbaylit, acku tulya-ya d tin ara ysefḍen aɣebbaṛ ɣef tidett, d ayen i d-yusan d akemmel deg wayen d-yebda yakan deg wagur n meɣres yezrin uselway n tagduda tafṛansist mass Emmanuel Macron. Ad nesmekti kan belli deg 13 ctember 2018, aselway n Fṛansa, iberreḥ-d s wudem unṣib belli amusnaw n tusnak Maurice Audin, ameɣnas akuminist n tallit-nni d win yettwanɣan deg usseggas n 1957 deg lezzayer, sɣur igen afṛansi.

Xas ulamma tulya n aṛciv n tṛad n 54-62,d win ɣef wayeg d-yemmeslay umazray Benjamin Stora deg waluhen imud i wselway n tagduda akken ad yili usemsawi deg wassaɣen gar Fṛansa d yegduden n lezzayer.

Yusa-d diɣen d tuttra i yisuturen n imazrayen yettnadin ad arun ɣef umezruy n tallit-a, acku ttafen-d deg yal tikelt uguren muqqren akken ad ḍillen ɣef aṛciv n fṛansa yellan deg “Aṛciv aɣelnaw ilel-nniḍen d Aix-en-Provence”.

Amahat d tallit tamaynut ara yeldin ɣef tidett n wayen yeḍṛan deg tallit-a, ad yesseɣli tikerkas n umezruy unṣib yeznuzuy yal-ass udabu azayri i warraw-nneɣ deg lakul azayri, d tiɣri i ymazrayen ladɣa iqabyliyen ad xemlen i yiɣallen-nsen, ad anin aṛciv-a ara yessazlen tidi tasemmaṭ ɣef imeddaḥen n udabu azayri.